Odilbek Odamboyev/“Xalq soʻzi”. Urganch xalqaro aeroporti uchish-qoʻnish yoʻlagini kapital taʼmirlash ishlari boshlangani munosabati bilan joriy yilning 20-iyul sanasidan oʻz faoliyatini vaqtincha toʻxtatgan edi. Rekonstruksiya davrida barcha reyslar Nukus xalqaro aeroportiga yoʻnaltirildi. Barcha yoʻlovchilar Urganchdan Nukus aeroportigacha bepul transport qatnovi yoʻlga qoʻyildi. Taʼmirlash ishlari rejada belgilanganidan ikki kun oldin yakunlanib, aeroport 2024-yil 5-avgust kuni Toshkent vaqti bilan soat 11:00 dan yana oʻz faoliyatini boshladi.

— Aeroportimiz kuniga 20 ga yaqin reyslarni qabul qilish, bir soatda 300 nafar yoʻlovchiga xizmat koʻrsatish imkoniyatiga ega, — deydi Urganch xalqaro aeroporti direktorining yordamchisi Rajabboy Otaboyev. — Aeroportning uchish qoʻnish yoʻlagi oxirgi marta 1997-yilda kapital, 2018-yilda qisman taʼmirlangan edi. Bu yil kapital taʼmirlash jarayoniga 98 ta maxsus texnika jalb qilinib, loyihada belgilangan ishlar muddatidan oldin yakunlandi. Endilikda aeroportimiz “Boing 787” va “Airbus A330” kabi keng fyuzelyajli samolyotlarni cheklovlarsiz qabul qiladi.

Urganch xalqaro aeroportida yaratilgan bunday imkoniyatlar viloyatga sayyohlar oqimini koʻpaytirish, hududning drayveri hisoblangan turizm sohasini yanada rivojlantirishga qulay sharoit yaratadi.