Архив сурат

Туркияда қиш мавсуми давом этмоқда ва мамлакатнинг ички қисми, шимолий ва шарқий ҳудудлари совуқ ойларда ёқимли дам олишни таклиф қилади. Қорли тоғларда Туркиянинг ажойиб қишки туризм имкониятларини ифодаловчи бир қанча чанғи марказлари жойлашган. Ушбу тоғ-чанғи курортлари, энг замонавий механик жиҳозлар ва оддийликдан ҳашаматлигача бўлган турли хил турар жой манзилларини ўз ичига олган, шунингдек, энг яхши турк ичимликлари ва таомлари мажмуасини таклиф этади. Келинг, Туркиянинг энг яхши чанғи манзилларини кўриб чиқайлик.

Эржиес — Aнадолу чўққисида
Мамлакатнинг ўртасида, дунёга машҳур Кападокиядан узоқ бўлмаган масофада, Марказий Aнадолу минтақасидаги энг баланд чўққи Эржиес тоғининг (3,916 м) тепасида Кайсеридаги Эржиес чанғи курорти жойлашган. Тоғ-чанғи курорти халқаро стандартларга тўла жавоб бероладиган энг сўнгги технологиялар билан жиҳозланган, соатига тахминан 26 750 кишини ўтказиш қувватига эга, тез демонтаж қилиш мумкин бўлган икки кишилик канатлари ва телефериклари билан эътиборни тортади. Чанғичилар канат ва телеферикларда эндемик ўсимликлар ва Эржиес тоғининг ажойиб манзараларини томоша қилишлари мумкин.

Эржиес, Пери бажалари, ғор меҳмонхоналари ва ер ости шаҳарларининг бетакрор манзараси билан кўришга арзийдиган жой бўлиб, Кападокиядан машинада бир соатлик масофада жойлашган. Мазали пастирма ва ўзининг чучваралари билан мафтун этган Кайсери шаҳри, шунингдек, Марказий Aнадолунинг маҳаллий узумларидан бири бўлган Эмирдан тайёрланган машҳур турк винолари ва Караманнинг маҳаллий “Дивле обрук” ва “Ниғде мави” (кўк) пишлоқларини тақдим этади.

Паландўкен — Эрзурумда қиш завқи
Йил давомида олти ой чанғи учиш мумкин бўлган Паландўкен чанғи маркази Туркиянинг шарқий Эрзурум вилоятидаги Паландўкен тоғи этагидаги Бошкўй тоғ қишлоғида денгиз сатҳидан 2100 метр баландликда жойлашган. 2011 йилги Жаҳон қишки Универсиада ўйинлари ва 2017 йилги Европа ёшлар қишқи олимпиадасига мезбонлик қилган Паландўкен тоғи тунги чанғи спорти учун ёритилган тоғ ёнбағирларни ва Туркиядаги энг узун қияликни таклиф этади. Марказ “New York Times” томонидан 41 та чанғи курортларининг энг яхши 20 талигига киритилган ва 22 та қияликдан иборат бўлиб, улар чанғида осон учиш имконини беради. Бундан ташқари, қияликларда бешта канат ва телефериклари хизмат кўрсатади. Паландўкен тоғлари, сноуборд, слалом ва катта слалом йўналишлари учун идеал ҳисобланади.

Бу ерда дунёдаги энг баланд шаршаралардан бири бўлган Тортум шаршараси жойлашган. Тортум кўли, Нарманнинг пери бажалари ва Испир Едигўллер Эрзурумнинг ўзига хос гўзал сайёҳлик манзиллари ҳисобланади.

Зираворлар билан маринадланган гўштларнинг чўпга терилиб ўтин оловида пишириладиган жағ кабоб Эрзурумнинг ўзига таомидир.

Сарикамиш — Туркиянинг энг шарқий чўққиси
Туркиянинг машҳур Шарқий Экспрес поездининг Эрзурумдан кейинги сўнгги бекати Карс, мамлакатнинг энг қизиқарли қишки мазилларидан биридир.

Шаҳар яқинидаги Чамурлу тоғида 2100-2634 метр баландликда жойлашган Сарикамиш тоғ-чанғи маркази дунёга машҳур Aлп тоғлари билан бир хил қор сифатига эга. Объект иккита механик қияликка эга бўлиб, биринчиси соатига 1800 кишини ўтказиш қувватига эга ва узунлиги 1435 метрни ташкил қилса, иккинчиси соатига 800 кишини ўтказиш қувватига эга ва узунлиги 2250 метрни ташкил қилади. Дам олиш маскани сариқ қарағай дарахтларининг гўзал кўринишига эга бўлган еттита чанғи ёнбағирларини таклиф этади.

UNESCOнинг Бутунжаҳон мероси рўйхатига киритилган қадимий Aни шаҳри ва музлаган сувлар бўйлаб от чаналари сирпаниб юрган Чилддир кўли доим сайёҳларни ўзига мафтун этади.

Карс услубидаги мазали пиширилган ғоз, Карс кашари ва груере каби минтақавий пишлоқлар ва маҳаллий Ўкузгўзи ва Боғазкере узумларидан тайёрланган анъанавий шароблар ҳар қандай дид нозик сайёҳга ҳам маъқул тушади.

Улудағ — Бурсанинг Оқ чўққиси
Бурсанинг жануби-ғарбида жойлашган Улудағдаги чанғи курорти Истанбулга яқинлиги билан Туркиянинг энг машҳур курортларидан биридир. Ғарбий Aнадолунинг энг баланд тоғи Улудағ этагидаги чанғи майдони 1750-2543 метрни ташкил қилади. Саккизта канат, еттита Т-бар ва 13 хил қияликларга эга чанғи маркази чанғи жиҳозларини ижарага олиш ва профессионал ўқитувчилардан дарсларни таклиф қилади. Бундан ташқари, Улудағдаги чанғи курортида ҳели-чанғи, сноуборд, конкида учиш ва қорда велосипедда учиш учун треклар мавжуд.

Бурса яқин атрофда жойлашган ва телеферик орқали осонгина бориш мумкин бўлган йўналишдир. Бурсанинг меҳмонхоналар ҳудудидаги монументал биноларни, айниқса Коза Хан ва Улу масжидини зиёрат қилиб, чанғи таътилингизни завқли ўтказишингиз мумкин.

Бурсанинг маҳаллий таоми — Искандар кабоб билан ҳам машҳур. Бурса Искандар кабобини татиб кўриш учун энг тўғри жой бўлиб, у тўғралмасдан олдин грилда пиширилади ва туғралган пита нонига иссиқ помидор соуси ва махсус сариёғ қўшилиб дастурхонга тортилади.