Ёзги трансферлар ойнаси ёпилишига 16 кун қолди. Шу муносабати билан Европа клубларининг трансферлар ойнасидаги ҳолатини таҳлил қилишни бошлаган эдик. Бугун «Арсенал» жамоаси ҳақида тўхталамиз:

Хўш, кимлар жамоани тарк этди?

«Арсенал» бу ёзги ойнада бир нечта асосий футболчиларини йўқотди:

Жоржиньо – шартнома муддати тугагач эркин агент сифатида Бразилиянинг «Фламенго» жамоасига ўтди;

Томас Парти – эркин агент сифатида Испаниянинг «Вильярреал» жамоасига йўл олди;

Киран Тирни – шартномаси якунлангач, «Селтик» клубига қайтди;

Такехиро Томиясу – эркин агент сифатида жамоани тарк этди;

Нуну Тавареш – Италиянинг «Лацио» клубига 5 миллион евро эвазига трансфер қилинди;

Маркиньос – «Крузейро» клубига 3 миллион евро эвазига кўчиб ўтди;

Рахим Стерлинг – ижара муддати якунланди ва ўз жамоаси «Челси»га қайтди;

Шунингдек, академия ва ёшлар жамоасидаги қатор футболчиларнинг баъзилари ижара асосида, айримлари эса эркин агент сифатида клубни тарк этди. Бироқ жамоанинг асосий йўқотишлари юқорида келтириб ўтилган футболчилардир.

Кимлар жамоага қўшилди?

«Арсенал» ёзги трансферлар ойнасида таркибини сезиларли даражада кучайтирди:

Кепа Аррисабалага – «Челси» жамоасидан 5,8 миллион евро эвазига харид қилинди;

Мартин Зубименди – «Реал Сосьедад» клубидан 70 миллион еврога сотиб олинди;

Кристиан Нёргаард – «Брентфорд»дан 11,6 миллион евро ва қўшимча бонуслар эвазига харид қилинди;

Нони Мадуэке – «Челси» жамоасидан 56 миллион евро ва қўшимча бонуслар эвазига трансфер қилинди;

Кристхиан Москуэра – «Валенсия» клубидан 15 миллион евро эвазига сотиб олинди;

Виктор Гёкерес – «Спортинг» жамоасидан 65,8 миллион евро ва 10 миллион бонус эвазига сотиб олинди.

«Арсенал» ёзги трансферлар ойнасида умумий трансфер харажатлари учун 224,2 миллион евро сарфлади ва атиги 8 миллион евро ишлаб топди.

Асосий трансферлар таҳлили

Виктор Гёкерес (27 ёшда, Швеция фуқароси, марказий ҳужумчи)

Бу футболчи «Арсенал»нинг афсонавий ҳужумчиларидан бири Оливье Жируни эслатади. Футбол тилида айтганда «таргет мэн» ҳужумчилар сирасига киради. Виктор юқори прессингда рақиб ҳимоячиларга жуда яхши босим ўтказа олади. «Opta» таҳлилий портали унинг xG индикаторларида етакчи эканини қайд этган;

Мартин Зубименди (26 ёшда, Испания фуқароси, таянч ярим ҳимоячи)

Мартин ўтган йили фойдали иш коэффициенти бўйича Ла Лигадаги энг яхши натижага эга ярим ҳимоячилардан бири бўлди. У мусобақа давомида рақибларнинг жами 116 та ҳужумини бузишга эришди. Зубименди ҳимоя пайтида жуда катта ҳудудни қамраб ола билиши билан ном қозонган. Унинг майдондаги якка курашларда ютқазмаслик қобилияти бу борада катта роль ўйнайди. Шунингдек, Мартин юқори босим остида ҳам тўпни яхши назорат қила олади. Айни шу масалада ўтган йили «Арсенал» таянч ярим ҳимоясида муаммолар бўлганди;

Нони Мадуэке (23 ёшда, Англия фуқароси, ўнг қанот вингеpи)

Нони янги мавсум «Арсенал» ҳужумларига янгича динамика олиб кириши кутилмоқда. Сабаби унда Жереми Доку сингари тўпни қанотдан марказга тезкорлик билан олиб кириш маҳорати яхши шаклланган. Футболчининг асосий устунлиги – тезлиги бўлиб, одатда дриблингларининг катта қисми самара беради. У жарима майдони ичида ҳам жуда хавфли. Ўтган мавсум АПЛ мусобақасида жарима майдони ичида тўп билан ҳаракатланиш бўйича Нони «Ливерпуль» футболчиси Муҳаммад Салаҳдан кейин иккинчи ўринда бўлди;

Кристхиан Москуэра (21 ёшда, Испания фуқароси, марказий ҳимоячи)

Москуэра жуда стратегик ҳимоячи. Унда Ван Дайкда бўлгани сингари рақибнинг ҳаракатларини олдиндан баҳолай олиш қобилияти яхши шаклланган. Унинг кам фол қўллаши ва хотиржамлиги Рафаэль Варанни эслатади. Микел Артета уни «ақл-заковатли, тезкор ва кўп позицияда ўйнай олиш имкониятига эга» ўйинчи деб баҳолади. Шунингдек, у марказий ва икки қанот ҳимоясида ўйнашга мослаша олади.

«Total Football» таҳлилига кўра, у ҳимоянинг энг қуйи қисмида стабил бўлиб ўйнайди, тез қарорлар қабул қила олади ва катта босим остида ҳам бехато узоқ паслар амалга ошира олиши билан ажралиб туради.

Хулоса ўрнида

«Арсенал»нинг ёзги трансферлар ойнасидаги харидлари жамоани яхшигина кучайтира олиши керак. Ном жиҳатдан олиб қараганда футболчилар бунга қодир. Энди Артета уларни ўз ўйин фалсафасига мослаб олса бас. Лекин янги футболчилар ёш эмаслиги ва кўпроқ индивидуал жиҳатдан ном қозонгани учун бунга кўп вақт кетиши кутилмоқда.

Жамоа АПЛ чемпиони бўла оладими?

Таҳлилий нашрлар ва мутахассислар АПЛнинг бу йилги чемпиони ким бўлиши ҳақидаги саволларга кўпроқ «Ливерпуль» деб жавоб беришмоқда; иккинчи ўринда энг кўп эслаётган жамоа эса «Арсенал».

Шундан келиб чиққан ҳолда жамоа «Ливерпуль» билан биргаликда АПЛ ғолиблиги учун асосий даъвогарлар сифатида эътироф этилмоқда.

Микел Артета интервьюларидан бирида: «Бу йил 9 клуб чемпион бўлиши мумкин, аммо бизда ғалаба учун керакли таркиб бор», дея фикр билдирди. Бу гаплар қанчалик ўзини оқлайди? Бу ҳақида шу ҳафта бошланадиган Премьер лига ўйинлари сўнгида билиб оламиз.

Муҳаммадамин Зуҳриддинов тайёрлади.