АҚШнинг сайланган президенти Дональд Трамп Мексика ва Канада мамлакатдан субсидия олишни давом эттиришни истаса, АҚШ штатига айланишини таклиф қилган. Бу ҳақда Трамп «NBC News» телеканалига берган интервьюсида маълум қилган.

Агар Канада ва Мексика АҚШга мигрантлар ва гиёҳванд моддалар оқимини камайтирмаса, Трамп ушбу мамлакатлар маҳсулотларига 25 фоизлик божхона солиғи жорий этишини айтиб ўтган. Трампнинг президент сифатидаги биринчи иш куни, 2025 йил 20 январида ноқонуний иммиграция ва гиёҳванд моддалар контрабандаси билан боғлиқ ҳолда Канада ва Мексикадан келаётган барча товарларга 25 фоизлик божлар жорий этиш билан таҳдид қилган.

«Биз Канадага йилига 100 миллиард доллардан ортиқ субсидия беряпмиз. Мексикага эса қарийб 300 миллиард доллар. Нима учун биз бу мамлакатларга субсидия беришимиз керак? Агар уларни субсидияламоқчи бўлсак, улар штатга айлансин», — деган Трамп.

«The Wall Street Journal»нинг ёзишича, бу таҳдид канадалик сиёсатчилар ва бизнесменларни ҳайратда қолдирган. Канада умумий экспортининг тахминан тўртдан уч қисми Қўшма Штатларга тўғри келганлиги сабабли, Америка бозорига божсиз кириши Оттаванинг иқтисодий ўсиши учун жуда муҳим омилдир.

Мексика Президенти Клаудия Шейнбаум Трамп Оқ уйга қайтгач, Мексика учун 25 фоизлик умумий тарифни жорий қилса, Мексика ҳам жавоб чораларини кўришини айтиб ўтган.