Фото: Reuters

АҚШ президенти Дональд Трамп 12 давлат фуқароларини АҚШга киришини тўлиқ ва яна етти давлат, жумладан Туркманистон фуқароларини қисман тақиқлади.

Республикачи бундай тақиқни ўзининг биринчи президентлик муддати даврида ҳам киритган эди, аммо ҳозир рўйхатга КХДР ва Сурия киритилмаган.

Оқ уй сайтида чоп этилган пресс-релизга кўра, Афғонистон, Мьянма, Чад, Конго Республикаси, Экваториал Гвинея, Эритрея, Гаити, Эрон, Ливия, Сомали, Судан ва Яман фуқароларига тўлиқ тақиқ қўйилган. Таъкидланишича, ушбу мамлакатларнинг Америка Қўшма Штатларида қонуний доимий резидентлари ва амалдаги визалар эгалари учун истиснолар мавжуд. Давлатлар рўйхати АҚШ Давлат департаменти томонидан январь ойидан бери ўтказилган таҳлил асосида тузилган.

Бурунди, Куба, Лаос, Серра-Леоне, Того, Туркманистон ва Венесуэла фуқароларига қисман тақиқ жорий этилди. Уларга ташриф ва талаба визалари берилмайди. Бироқ, ишлаш ёки америкалик қариндошлар билан учрашиш учун визалар ўз кучида қолади.

Дональд Трампнинг сўзларига кўра, Колорадо штатининг Боулдер шаҳрида яҳудий фаолларига қарши уюштирилган антисемит ҳужум ушбу чора-тадбирларга сабаб бўлган.

Ўшанда хотини ва болалари билан АҚШда ноқонуний яшаб келган 45 ёшли Миср фуқароси «Фаластинга озодлик!» деб ҳайқирганча оломон орасига молотов коктейли улоқтирган эди. “Associated Press” хабарига кўра, ушбу ҳужум оқибатида 15 киши тан жароҳати олган.

“Биз XXI асрда бутун дунё бўйлаб хавфли жойлардан келган, муддати ўтган визаси бўлган хорижликлар томонидан содир этилган террорчилик хуружларини кўрдик ва кўришда давом этмоқдамиз”, — дейди АҚШ президенти. Унинг қўшимча қилишича, мамлакатда бундай одамлар миллионлаб бор.

Трамп терактлар ҳақида гапирар экан, “Европада содир бўлган воқеалар АҚШда бўлишига” йўл қўймаслигини айтди. Шу ўринда у тақиқланган давлатлар рўйхатига янги давлатлар қўшилиши мумкин, дея таҳдид ҳам қилди.

Дональд Трамп ўзининг биринчи президентлик муддати давомида Куба, Чад, Эрон, Ливия, Шимолий Корея, Сомали, Судан, Сурия, Венесуэла ва Яман фуқароларига ҳам худди шундай тақиқ қўйган эди. Бу чора Жо Байден томонидан бекор қилинганди. Бу сафар Шимолий Корея ва Сурия тўлиқ ёки қисман тақиқга киритилмаган.

Трампнинг сўзларига кўра, бу чора унинг биринчи муддатида “жуда муваффақиятли” бўлган ва АҚШда терактларнинг олдини олган.