Ижтимоий тармоқларда метрополитеннинг ер усти йўналишидаги поездларида совитиш тизими ишламаётгани хусусида хабарлар тарқалди. Ҳолат юзасидан «Тошкент метрополитени» ДУК ахборот хизмати ўз изоҳини берди.

«Ҳозирги вақтда, «Ер усти ҳалқа йўли» йўналишида 10 та ҳаракат таркиби ҳаракатланмоқда ва шундан 8 таси жорий йилда харид қилинган поездлар бўлиб, уларнинг совитиш тизими ҳаво ҳарорати +50°C иссиққача белгиланган норма бўйича ишлаш имкониятига эга.

Бундан ташқари, яна бошқа мавжуд 2 та ҳаракат таркиблари ўтган йиллар давомида олиб келинган бўлиб, асосан ер ости метро бекатларида ҳаракатланишига мўлжалланган ҳамда уларнинг совитиш тизими эса, ҳарорат +40°C гача бўлган иссиқда ишлашга мўлжалланган.

Шу сабабли, жалб этилган малакали мутахассислар томонидан, бу ҳаракат таркибларининг совитиш тизимларининг ускуналари модернизация қилинмоқда. Амалга оширилаётган ишлар натижасида, юзага келаётган бу каби камчиликлар яқин кунлар ичида тўлиқлигича бартараф этилади», дейилади хабарда.

Метрополитеннинг «Ер усти ҳалқа йўли» йўналишида ҳаракатланаётган ҳаракат таркибларининг совитиш тизими билан боғлиқ камчиликларни бартараф этиш мақсадида, кучайтирилган тартибда махсус ишчи гуруҳ тузилган бўлиб, бу ишчи гуруҳ таркибига Россия Федерациясидан ҳам 15 дан зиёд соҳа мутахассислари жалб этилган.

«Тошкент метрополитени» ДУК келтирилган ноқулайликлар юзасидан йўловчилардан узр сўраган. Тузатиш ишлари давом этмоқда.