Фото: «Uzbekistan Airports»

Тошкент халқаро аэропортининг учиб кетиш терминалида (рўйхатдан ўтиш зали) «Қўноқ» бренди остидаги капсула меҳмонхонаси очилди. Бу ҳақда «Uzbekistan Airports» хабар берди.

Қайд этилишича, эндиликда йўловчилар ўз парвозларига рўйхатдан ўтишдан олдин стерил бўлмаган ҳудудда бемалол дам олишлари мумкин. Мини-меҳмонхонада олтита замонавий капсула — тўртта стандарт бир кишилик ва иккита оилавий (икки кишилик) капсула мавжуд.

Ҳар бир капсула индивидуал ёпиқ жой бўлиб, ортопедик матрас, чойшаблар тўплами, қулай ортопедик матрасли кровать, индивидуал шамоллатиш ва ёритиш тизимлари, розеткалар ва зарядлаш мосламалари учун USB портлар билан жиҳозланган. Меҳмонларга қулайлик яратиш учун шахсий сейф, ойна, кийим илгич ва соатли экран мавжуд. Капсула оптимал микроиқлимни сақлаб туради.

Бир кишилик стандарт капсула тарифлари:

• 4 соатгача — 400 000 сўм;
• 6 соатгача — 600 000 сўм;
• 8 соатгача — 800 000 сўм.

Икки кишилик стандарт капсула тарифлари:

• 4 соатгача — 600 000 сўм;
• 6 соатгача — 800 000 сўм;
• 10 соатгача — 1 000 000 сўм.

«Ушбу мини-меҳмонхона концепцияси транзит йўловчилар, шунингдек, бошқа вилоятлар ёки қўшни давлатлардан парвоздан бир неча соат олдин келган йўловчилар учун ажойиб ечимдир», дейилади хабарда.

Айтиш жоиз, Тошкент аэропорти жўнаш терминалининг стерил ҳудудида ҳам икки йилдан буён «Қўноқ» бренди остида меҳмонхона фаолият кўрсатиб келмоқда.