Фарҳод ЭСОНОВ/«Халқ сўзи». Соғлиқни сақлаш вазири Ангор туманида бўлиб, соҳада олиб борилаётган ишлар билан танишди.

Дастлабки манзил тумандаги «Қўзи Тўлаков» оилавий поликлиникаси бўлди. Мазкур оилавий поликлиникада Баҳор ва Илғор маҳаллаларида яшовчи 9 минг нафардан зиёд аҳолига тиббиёт хизмат кўрсатилади. Поликлиникада стоматолог, гинеколог, хирург ҳамда УТТ мутахассислари фаолият олиб боради.

Вазир поликлиникада яратилган шароитлар билан танишди. Шунингдек, патронаж ҳамширалари билан суҳбатлашди.

Туман ҳокимлиги мажлислар залида тиббиёт ходимлари билан учрашув бўлиб ўтди. Учрашув давомида тиббиёт соҳасида Сурхондарёда олиб борилаётган ишлар муҳокама қилинди. Аниқланган камчиликларни бартараф этиш бўйича тавсия ва топшириқлар берилди. Соҳада самарали меҳнат қилаётган тиббиёт ходимлари ташаккурнома ва эсдалик совғалар билан тақдирланди. Вилоятнинг шаҳар ва туманларида фаолият олиб бораётган патронаж ҳамшираларига электромопедлар топширилди.

Шунингдек, Республика тез тиббий ёрдам маркази Сурхондарё вилояти филиалига қарашли Ангор тумани тез тиббий ёрдам станциясининг янги биносининг фойдаланишга топширилиши маросимида вазир иштирок этди.

Ушбу бино қурилиши учун «Ташаббусли бюджет» лойиҳаси орқали овоз тўпланиб, 1 миллиард 340 миллион сўм маблағ қўлга киритилган эди. Ушбу маблағ мақсадли сарфланиб, қисқа фурсатда янги тез тиббий ёрдам станцияси биноси барпо этилди.

Тадбир доирасида муассасага «Volkswagen Caddy» русумли замонавий тез тиббий ёрдам машинаси топширилди.