Ўзбекистон Олий Мажлиси Сенати раисининг биринчи ўринбосари Содиқ Сафоев Жанубий Кореянинг сайланган президенти Юн Сок Ёлга Ўзбекистон президентининг табригини етказди, деб хабар беради «Дунё» агентлиги.

Маълум қилинишича, Содиқ Сафоев бошчилигидаги делегациясининг Юн Сок Ёл билан бўлган музокаралари Жанубий Корея матбуотида кенг ёритилмоқда. Хусусан, мамлакатдаги етакчи нашрлар — The Korea Herald, The Korea Times газеталари, Yonhap ахборот агентлиги ва қатор веб-сайтларида ушбу учрашув ҳақида туркум материаллар эълон қилинган.

Ушбу материалларда Жанубий Кореянинг янги сайланган президенти Юн Сок Ёл унинг инаугурациясида иштирок этиш учун Жанубий Кореяга келган хорижий делегатлар билан душанба куни учрашувлар ўтказгани маълум қилинган.

«Хусусан, Юн Сок Ёл Буюк Британиянинг Осиё ва Яқин Шарқ масалалари бўйича давлат вазири Аманда Фрезинг, Ўзбекистон Олий Мажлиси Сенати раисининг биринчи ўринбосари Содиқ Сафоев ва Япониянинг собиқ бош вазири Юкио Хатояма билан алоҳида учрашди», — деб таъкидлаган Жанубий Корея ОАВ.

Нашрларда Юн Сок Ёл Ўзбекистон делегацияси раҳбари Содиқ Сафоев билан ўтказган музокаралари чоғида турли соҳалардаги ўзаро ҳамкорликни янада кенгайтириш тарафдори эканини таъкидлагани қайд этилган.

Жанубий Корея президенти Сеул шаҳрининг Тонги-Донг туманида жойлашган қароргоҳида Ўзбекистон делегациясини қабул қилган. «Жанубий Кореянинг янги президентига Ўзбекистон президентининг шахсий табриги топширилди», — деб ёзади манба.

Жанубий Корея президенти Ўзбекистон делегацияси билан учрашувда ўзаро муносабатларни янада чуқурлаштириш тарафдори эканини қайд этган. «Корейс ва ўзбек халқлари, икки мамлакат ишбилармонлари ўртасидаги алоқаларни янада мустаҳкамлашни, Жанубий Корея компаниялари Ўзбекистонга кўпроқ сармоя киритишини қўллаб-қувватлаймиз. Бу йил мамлакатларимиз ўртасида дипломатик муносабатлар ўрнатилганининг 30 йиллиги нишонланмоқда. Ўзбекистонда яшовчи 200 мингга яқин корейслар мамлакат ҳаётининг сиёсий, бизнес, маданий ва бошқа соҳаларида фаол иштирок этиб, икки мамлакат ўртасидаги мустаҳкам кўприк бўлиб хизмат қилмоқда», — дея президент сўзларидан иқтибос келтирган электрон нашр.

Мақолада қайд этилишича, Содиқ Сафоев Ўзбекистон Жанубий Корея номзодини БМТ Хавфсизлик кенгашининг доимий бўлмаган аъзолигига сурилишини қўллаб-қувватлашини маълум қилган. «Ўзбекистон президенти Жанубий Корея ва Ўзбекистон ўртасидаги алоҳида дўстлик муносабатларини доимо қўллаб-қувватлайди. Сўнгги беш йилда Ўзбекистон билан Жанубий Корея ўртасидаги ҳамкорлик алоқалари кенгайди ва чуқурлашди. Улар икки бараварга ошди», — дея Ўзбекистон делегацияси раҳбари сўзларидан иқтибос келтирилган мақолада.

Эслатиб ўтамиз, Жанубий Кореяда президентлик сайловлари 9 март куни бўлиб ўтганди, унда рўйхатга олинган сайловчиларнинг 77,1 фоизи иштирок этган, яъни 44 миллион сайловчиларнинг 34 миллиони қатнашган. Президентлик учун асосий номзодлар мамлакатдаги ҳукмрон Бирлашган демократик партия вакили Ли Чже Мён ва унинг асосий рақиби «Фуқаролик кучи» мухолифат консерватив партияси номзоди Юн Сок Ёл эди. Учинчи оммалашган номзод марказий «Халқ партияси» вакили Ан Чхол Су сайловлардан аввал Юн Сок Ёл номзодини қўллаб-қувватлашини маълум қилган. 10 март куни эълон қилинган натижаларга кўра, Жанубий Кореядаги президентлик сайловларида мухолифатчи Юн Сок Ёл ғалаба қозонган.