Иллюстратив фото

Туркия ташқи ишлар вазири Мевлут Чавушўғли Швеция НАТОга аъзо бўлишга тайёр эмаслигини айтди.

Унинг таъкидлашича, Американинг «F-16» қирувчи самолётларини Анқарага сотиш шарти сифатида Швециянинг альянсга аъзолигини илгари суришни қабул қилиб бўлмайди. Туркия уларни 2021 йил октябрь ойида қайтариб сотиб олиш истагини билдирган.

«Улар «F-16»ни бизга сотиш шарти сифатида Финляндия ва Швециянинг НАТОга аъзолигини илгари суришга ҳаракат қилмоқда. Бу қабул қилиниши мумкин эмас, биз буни қабул қилмаймиз. Биз Финляндияни маъқулладик, аммо Швецияни ҳозирча чиқариб ташладик. У ҳали НАТОга киришдан йироқ, тайёр эмас, унга вақт керак», деди Мевлут Чавушўғли «A Haber» телеканалида.

Шунингдек, у НАТО бош котиби Йенс Столтенбергнинг Швеция ҳам Финляндия сингари альянсга кириш учун барча шартларни бажарганлиги ҳақидаги сўзларига изоҳ берди.

«Бош котиб ва Швеция расмийларининг барча шартлар бажарилгани ҳақидаги баёнотларига қарамай, биз ҳали ҳам узоқ нуқтадамиз», деди Туркия ТИВ раҳбари.

Финляндия ва Швеция 2022 йил май ойида НАТОга кириш учун ариза топширган. Финляндия иттифоқнинг барча давлатларидан розилик олди. Унинг НАТОга кириш маросими 4 апрель куни бўлиб ўтди. Бироқ, Швециянинг аъзолик масаласини Венгрия ва Туркия ратификация қилмаган.

Анқара курд фаолларини экстрадиция қилиш ва терроризмга қарши курашни кучайтириш учун қонун қабул қилиш каби қатор шартлар бажарилишини талаб қилмоқда.

Шу йилнинг 21 январь куни Даниянинг Ислом динига қарши «Stram Kurs» партияси раҳбари Расмус Палудан Туркиянинг Стокголмдаги элчихонаси олдида Қуръонни ёқиб юборди. Акция шаҳар маъмурияти билан келишилган ва Палудан бундай чиқиш учун тўловни амалга оширган.

Шундан сўнг, Туркия президенти Режеп Таййип Эрдоған Швеция НАТОга аъзолик масаласида Туркия ёрдамига умид қила олмаслигини айтди.

«Швециядаги, ҳаттоки дипломатик ваколатхонамиз яқинидаги бу нопок ҳаракатлар мусулмонлар, умуман, барча инсонлар, барча ҳуқуқ ва эркинликларни ҳақорат қилиш ҳисобланади», деди Туркия президенти.

Унинг сўзларига кўра, Швеция Шимолий Атлантика альянсига киришда «энди ёрдам кутмаслиги керак», чунки мамлакат «террорчиларни қўллаб-қувватлашда давом этмоқда».

Шу йилнинг 1 апрель куни Режеп Таййип Эрдоған Финляндия аризасини ратификация қилишни маъқуллади.