«Chess.com» 2024 йил шахмат турнирларида энг катта мукофот пулларини қўлга киритган шахматчилар рўйхатини эълон қилди. Бу ҳақда нашр ўз сайтида ахборот қолдирди.

Унга кўра, Нодирбек Абдусатторов 2024 йилда 12 та йирик турнирда қатнашиб, жами 132 минг 981 АҚШ доллар маблағ ишлаб олган. Ўзбекистон вакили энг кўп пул топган шахматчилар рўйхатида 12-поғонани банд қилган.

2024 йилда энг кўп пул ишлаб олган шахматчи ҳиндистонлик Гукеш Доммаражу бўлди. У 8 та турнирда иштирок этиб, жами 1 миллион 577 минг 842 АҚШ доллар ишлаб олишни уддасидан чиққан. Иккинчи ўринни 1 миллион 183 минг 600 доллар билан хитойлик Динг Лирен банд қилган. Кучли учликни франциялик Алиреза Фирузжа 639 минг 173 доллар маблағ билан якунлаб берган.

Қайд этиш керакки, ҳиндистонлик амалдаги жаҳон тожи эгаси ва хитойлик экс-чемпион ушбу маблағнинг катта қисмини айнан Сингапурдаги чемпионлик матчларида ишлаб олишган.

Дунёнинг энг кучли гроссмейстери, норвегиялик Магнус Карлсен эса 633 минг 369 доллар билан 4 ўриндан жой олган.

Маълумот учун айтиш керакки, ушбу ишлаб олинган маблағлар фақатгина турнирдаги ишлаб олган маблағлар ҳисобидан шакллантирилган. Бундан ташқари, очиқланмайдиган гонорарлар ва рекламадан тушадиган пул миқдори очиқланмаган.