Бугун мамлакатимизда туризм соҳаси иқтисодиётнинг стратегик тармоқларидан бири сифатида жадаллик билан ривожланмоқда. Бир қатор қонуний асосларнинг яратилаётгани эса унинг тараққиётига замин бўлмоқда.

Келинг энди соҳадаги ютуқларга бир кўз ташлайлик. Айни вақтда фуқароларидан мамлакатимизга виза талаб этилмайдиган мамлакатлар сони 9 тадан 86 тага етказилди, 53 та давлат учун «электрон виза» тизими жорий этилди. Энг муҳими, туризм учун қийин бўлган жорий йилда соҳадаги субъектлар ҳар томонлама қўллаб-қувватланди, уларга субсидия ва ссудалар берилди.

Жорий йил 9 декабрь куни Президентимиз раислигида ўтказилган видеоселектор йиғилишининг мазкур мавзуга бағишлангани ҳам соҳадаги тизимли ишларни янги босқичга кўтаришни ўзида ифода этди.

Танқидий руҳда ўтган йиғилишда соҳадаги камчиликларни бартараф этиш, мамлакатимизнинг туризм салоҳиятини тиклаш ва ривожлантириш истиқболлари муҳокама қилингани бежиз эмас.

Инчунин, келгуси йилда 1,7 миллион хорижий, 7.5 миллион маҳаллий сайёҳларни жалб қилиш, туризм хизматлари экспортини 370 миллион долларга етказиш мақсад қилинган. Бу борадаги энг катта манба эса зиёрат туризмидир. Юртимизнинг бу йўналишдаги ютуқлари талайгина. Бу имкониятдан фойдаланиш орқали 700 минг зиёратчини жалб қилиш ва ўз навбатида, 130 миллион долларлик хизматлар экспортини таъминлашга эришиш мумкин.

Шу билан бирга, бугун соҳада шундай муаммолар ҳам борки, ундан асло кўз юмиб бўлмайди. Бу миллий авиакомпаниядаги чипталарнинг нархи баландлиги масаласи. Табиийки, оддий фуқаро ёки биргина маошга кун кечирадиган юртдошимиз хорижий саёҳатга истаганида боролмайди. Чипта нархига етадиган пулни ёки мисқоллаб тўплаши ёки қарзга олиши керак – агар албатта истаса...

Президентимиз томонидан бу масала қаттиқ танқид остига олингани, уларни арзонлаштириш вазифаси қўйилгани ҳам фуқароларимиз, халқимиз манфаатлари учун, албатта.

Яна бир қувонарли жиҳати, келгусида Европанинг қатор мамлакатлари билан авиақатновларни босқичма-босқич тиклаш ва янги рейсларни йўлга қўйиш бўйича кўрсатмалар берилгани соҳанинг янада жадал ривожланишига хизмат қилади.

Мамлакатимиз қадимий обидалар, муқаддас зиёратгоҳлар билан бир қаторда, бетакрор маданияти ва анъаналари, хушманзара табиати билан сайёҳларни ўзига ром этиб келаётганини яхши биламиз. Бу борада зиёрат туризми бўйича салоҳиятли давлатлар фуқаролари учун виза тизимини соддалаштириш йўлга қўйилиши айни муддаодир.

Хулоса қилиб айтганда, саёҳат қилиш инсонни руҳлантиради, дунёқарашини кенгайтиради, энг муҳими, инсон атрофга янгича қарай бошлайди. Шу жиҳатдан келгуси йилдан «Ўзбекистон бўйлаб саёҳат қил!» номли ички туризм дастурининг изчил давом эттирилиши муҳим воқеликдир. Зотан, саёҳат ортидан қанча тажриба, билим орттириш мумкин.

Абдулла РЎЗМEТОВ,
Олий Мажлис Қонунчилик палатаси депутати,
ЎзЛиДеП фракцияси аъзоси