Абдулазиз ЙЎЛДОШЕВ/«Халқ сўзи». Самарқанд давлат тиббиёт университети томонидан “Клиник неврология ва нейрореабилитацияда инновацион ёндашувлар” мавзусида халқаро илмий-амалий конференция ўтказилди. Унда Испания, Россия, Туркия, АҚШ, Франция, Сингапур, Қозоғистондан таниқли мутахассислар ва мамлакатимизнинг етакчи олий тиббиёт таълим муассасалари ва илмий-амалий марказларидан вакиллар иштирок этди.

Халқаро конференциянинг ялпи мажлисида олимлар ва тадқиқотчиларнинг “Неврологик амалиётда оғриқ синдромларини даволашга табақалаштирилган ёндашувлар”, “Нейрореабилитациядаги замонавий тенденциялар”, “Инсульт ўтказган беморларни далилларга асосланган реабилитация қилиш”, “Францияда нейрореабилитация соҳасидаги инновациялар”, “Ўзбекистонда паркинсон касаллиги ва марказий асаб тизимининг бошқа ҳаракат бузилишларини жарроҳлик йўли билан даволашнинг дастлабки натижалари” каби долзарб мавзулар бўйича маърузалари тингланди.

Анжуманда миянинг ишемик касаллиги, неврологик касалликларни ташхислаш ва даволашда инновацион технологиялар, нейрореабилитация, нейрохирургия, амалий неврологиянинг бошқа йўналишлари, замонавий диагностика шароитида неврологик бузилишларга чалинган беморларга тиббий ёрдам кўрсатиш самарадорлигини ошириш йўллари каби муҳим масалалар муҳокама қилинди.

Бундай тадбирлар республика ва минтақада неврология ва нейрореабилитация соҳасини янада ривожлантириш, тиббиёт кадрларини тайёрлаш, тиббиёт олий таълим муассасалари ва илмий-тадқиқот марказлари ўртасидаги халқаро ҳамкорликни янада ривожлантиришга хизмат қилади.