Фото: Видеодан кадр

Самарқанд вилояти Пахтачи туманида автобус ва 3 та автомобиль иштирокида йўл-транспорт ҳодисаси юз берди. Ҳодиса оқибатида икки киши ҳалок бўлди. Бу ҳақда «Марказий студия» информацион дастурида маълум қилинди.

Қайд этилишича, вилоятлараро қатновчи «Cobalt» ҳайдовчиси М-37 халқаро автомобиль йўлининг Пахтачи тумани ҳудудидан ўтган қисмида бошқарувни йўқотган.

Машина ўзи билан бир йўналишда ҳаракатланиб келиб қайрилиб олаётган «Tracker»га урилган. Сўнг қарама-қарши томонга ўтиб кетиб, «Nexia-3» ва автобус билан тўқнашган.

Оқибатда оғир тан жароҳатлари олган «Cobalt» йўловчиси ҳодиса жойида, ҳайдовчиси шифохонада вафот этган.

Видеолавҳада айтилишича, автомактаб ўқитувчи-инструктори йўл-транспорт ҳодисаси содир этиб ҳодиса жойидан қочиб кетган.

Қайд этилишича, ҳодиса юзасидан Пахтачи тумани ИИБ тергов бўлими томонидан жиноят иши қўзғатилган. Ҳозирда тергов ҳаракатлари олиб борилмоқда.