Ўзбекистон Миллий хавфсизлик хизмати (ДХХ) ва Ички ишлар вазирлиги (ИИВ) томонидан ўтказилган тезкор тадбирлар давомида фуқароларни ноқонуний равишда «Ҳаж» ва «Умра» зиёратларига юборишга уринган шахслар қўлга олинди. Ушбу ноқонуний ҳолатлар Наманган, Хоразм ва Фарғона вилоятларида аниқланган бўлиб, фирибгарлар фуқароларни алдамчи йўллар билан Саудия Арабистонига юборишни ваъда қилган.

Наманган вилоятида аниқланган илк ҳолатда, Андижон вилоятининг Балиқчи туманида яшовчи фуқаро маҳаллий фуқаролардан бири ишончига кириб, унинг ота-онасини Наманган шаҳридаги сайёҳлик фирмаларидан бири орқали «Ҳаж» зиёратига юбориш учун 20 минг АҚШ доллари талаб қилган. У ушбу маблағни олаётган вақтида қўлга олинди. Яна бир ҳолатда, Наманган шаҳридаги туристик фирмада ишловчи шахс икки фуқарони Саудия Арабистонига юбориш эвазига 15 минг АҚШ доллари талаб қилиб, олдиндан 10 минг АҚШ доллари олаётганида ашёвий далиллар билан ушланди.

Хоразм вилоятида содир бўлган фирибгарлик ҳолатида Гурлан туманида яшовчи фуқаро уч нафар қорақалпоғистонлик фуқарони Тошкент шаҳридаги литсензияга эга бўлмаган туристик фирма орқали «Умра» зиёратига юборишга ваъда берган. У 3450 АҚШ доллари олаётган пайтда ҳуқуқ-тартибот идоралари томонидан қўлга олинди.

Фарғона вилоятида ҳам шунга ўхшаш фирибгарлик ҳолатлари қайд этилди. Тошлоқ туманида яшовчи фуқаро расмий ваколатларсиз визалар тайёрлаб, Қўштепа туманида яшовчи икки нафар фуқарони «Умра» сафарига жўнатиш эвазига 2400 АҚШ доллари олаётганида ушланди. Яна бир ҳолатда, Қува туманида яшовчи шахс «Телеграм» мессенжерида ўзини «Умра» зиёратларини ташкил этувчи фирма вакили сифатида таништириб, икки нафар фуқарони Саудия Арабистонига юбориш учун 3100 АҚШ доллари талаб қилган. У олдиндан 1800 АҚШ доллари олаётганида ушланди.

Ҳозирда мазкур шахсларнинг ноқонуний ҳаракатларига қарши жиноят ишлари қўзғатилиб, тергов ҳаракатлари олиб борилмоқда. Ҳуқуқ-тартибот идоралари фуқароларни расмий равишда тасдиқланган зиёрат дастурларига амал қилишга чақирмоқда.