Oʻzbekiston Milliy xavfsizlik xizmati (DXX) va Ichki ishlar vazirligi (IIV) tomonidan oʻtkazilgan tezkor tadbirlar davomida fuqarolarni noqonuniy ravishda “Haj” va “Umra” ziyoratlariga yuborishga uringan shaxslar qoʻlga olindi. Ushbu noqonuniy holatlar Namangan, Xorazm va Fargʻona viloyatlarida aniqlangan boʻlib, firibgarlar fuqarolarni aldamchi yoʻllar bilan Saudiya Arabistoniga yuborishni vaʼda qilgan.
Namangan viloyatida aniqlangan ilk holatda, Andijon viloyatining Baliqchi tumanida yashovchi fuqaro mahalliy fuqarolardan biri ishonchiga kirib, uning ota-onasini Namangan shahridagi sayyohlik firmalaridan biri orqali “Haj” ziyoratiga yuborish uchun 20 ming AQSH dollari talab qilgan. U ushbu mablagʻni olayotgan vaqtida qoʻlga olindi. Yana bir holatda, Namangan shahridagi turistik firmada ishlovchi shaxs ikki fuqaroni Saudiya Arabistoniga yuborish evaziga 15 ming AQSH dollari talab qilib, oldindan 10 ming AQSH dollari olayotganida ashyoviy dalillar bilan ushlandi.
Xorazm viloyatida sodir boʻlgan firibgarlik holatida Gurlan tumanida yashovchi fuqaro uch nafar qoraqalpogʻistonlik fuqaroni Toshkent shahridagi litsenziyaga ega boʻlmagan turistik firma orqali “Umra” ziyoratiga yuborishga vaʼda bergan. U 3450 AQSH dollari olayotgan paytda huquq-tartibot idoralari tomonidan qoʻlga olindi.
Fargʻona viloyatida ham shunga oʻxshash firibgarlik holatlari qayd etildi. Toshloq tumanida yashovchi fuqaro rasmiy vakolatlarsiz vizalar tayyorlab, Qoʻshtepa tumanida yashovchi ikki nafar fuqaroni “Umra” safariga joʻnatish evaziga 2400 AQSH dollari olayotganida ushlandi. Yana bir holatda, Quva tumanida yashovchi shaxs “Telegram” messenjerida oʻzini “Umra” ziyoratlarini tashkil etuvchi firma vakili sifatida tanishtirib, ikki nafar fuqaroni Saudiya Arabistoniga yuborish uchun 3100 AQSH dollari talab qilgan. U oldindan 1800 AQSH dollari olayotganida ushlandi.
Hozirda mazkur shaxslarning noqonuniy harakatlariga qarshi jinoyat ishlari qoʻzgʻatilib, tergov harakatlari olib borilmoqda. Huquq-tartibot idoralari fuqarolarni rasmiy ravishda tasdiqlangan ziyorat dasturlariga amal qilishga chaqirmoqda.