Президент Администрацияси раҳбари Саида Мирзиёева Женевада Ўзбекистон мустақиллигининг 34 йиллигига бағишлаб ташкил этилган қабул маросимида нутқ сўзлади.

У ўз нутқида келажак, ислоҳотлар, барқарор тараққиёт, маданият ҳақида, шунингдек, чегаралардан қатъи назар, барча учун муҳим бўлган қадриятлар хусусида фикр алмашилганини таъкидлади.

— «Биз келажак, ислоҳотлар, барқарор тараққиёт, маданият ҳақида, шунингдек, чегаралардан қатъи назар, барчамиз учун муҳим бўлган қадриятлар хусусида фикр алмашдик. Бир янгилик билан ўртоқлашишдан айниқса жуда мамнунман: тез орада Женевадаги БМТ биносида «Ўзбекистон хонаси» очилади. Бу — маданиятимизнинг мўъжазгина бир бўлаги кўп миллатли ҳамжамиятга намойиш этиладиган маскан бўлади.

Ушбу маскан ҳар қандай қийинчилик ва зиддиятларга қарамай, бизнинг дунёга очиқлигимиз рамзига айланади», — деди Саида Мирзиёева.

Шунингдек, у «Ўзбекистон хонаси»нинг очилиши мамлакатимизнинг халқаро ҳамжамиятдаги ўрни ва нуфузини янада оширишини, миллий қадриятларимиз, маданиятимиз ва ўзлигимизни кенг жамоатчиликка намойиш этишга хизмат қилишини алоҳида қайд этди.