Фото: Видеодан кадр

Россия ҳудудида ноқонуний бўлиб турган 4 нафар ўзбекистонлик йигит Владивосток шаҳридаги пляжда 21 ёшли қизга тажовуз қилишда айбланмоқда. Бу ҳақда Приморск ўлкаси судларига таяниб, РИА Новости хабар берди.

Манбага кўра, бугун, 18 июнь куни Россиянинг Приморск ўлкаси суди 4 нафар ўзбекистонлик йигитга 21 ёшли қизнинг жинсий дахлсизлигини бузиш ҳолатлари бўйича жиноий иш очган.

Тергов маълумотларида келтирилишича, Владивосток аэропортида Федерациядан ташқарига қочишни режалаштирган Марказий Осиё республикаларидан бирининг тўрт нафар фуқароси қўлга олинган. Шунингдек, ҳужжатда иш жорий йилнинг 15 июнь куни Шамора пляжи ҳудудидаги кафеда содир бўлган воқеа билан боғлиқлиги қайд этилган.

Унга кўра, ўша куни беш нафар муҳожир олдиндан тил бириктириб, 21 ёшли кафе ходими (қиз)га пичоқ тираган ва унга тажовуз қилган.

Қўшимча қилинишича, суд тўрт нафар айбланувчига нисбатан икки ойлик қамоққа олиш эҳтиёт чораси тайинлаган. Бешинчисининг процессуал ҳолати эса ҳали аниқланмаган.