АҚШ президенти Дональд Трамп ҲАМАСга Ғазодаги барча гаровга олинганларни озод қилиш учун сўнгги огоҳлантиришни берди. Бу ҳақида «BBC» нашри маълум қилди.

Қўшма Штатлар шу вақтга қадар ҲАМАС гуруҳи билан тўғридан-тўғри алоқа қилишдан бош тортиб келган. Сабаби АҚШнинг террорчи ташкилотлар рўйхатига киритилган тузилмалар билан муҳокама ўтказмаслик бўйича узоқ йиллик сиёсати мавжуд эди.

«BBC» нашрига кўра, Оқ уй матбуот котиби Каролин Леавитт АҚШ гаровга олинганларни озод қилиш учун ҲАМАС билан бевосита музокара олиб бораётганини тасдиқлаган.

«Қўшма Штатлар ҳамда ҲАМАС ўртасида музокаралар бошланди. АҚШ бу муҳокама олдидан Исроил ҳукумати билан маслаҳатлашди», — деган Леавитт.

Кеча, 5 февраль куни Америка раҳбари Дональд Трамп ўзининг ижтимоий тармоқлардаги саҳифасида ҲАМАС ҳаракатига нисбатан сўнги огоҳлантириш юборганини маълум қилди.

«Сўнгги танлаш имкониятингиз қолди. Барча гаровга олган Исроил фуқароларини озод қилинг ва ўлдирилган асирларнинг жасадларини зудлик билан ватанига қайтаринг. Рад этсангиз бу сиз учун жуда қимматга тушади. Фақат носоғлом одамларгина ўлдирилган жасадларни ушлаб туради – сиз айнан шунақасиз», — деган Трамп.

Шунингдек у, Исроил ҳукуматига ҲАМАС билан можароларни якунлаш учун барча керакли ёрдамларни юбораётганини ҳам қўшимча қилди.

«Мен Исроилга ҳамма нарсани бераман, агар айтганимни қилмасангиз, бирорта ҳам ҲАМАС аъзоси омон қолмайди. Мен ҳозиргина собиқ гаровда ушлаб турилганлар билан суҳбатлашдим ва шу қарорга келдим», — дейди у.

Бундан ташқари, Трамп ўз мурожаатида Ғазо халқига ҳам таҳдидли чақириқ йўллаган.

«Сизларни ажойиб келажак кутмоқда, аммо раҳбариятингиз гаровдагиларни қўйиб юбориши шарт. Улар буни рад қилишса ҳаммангиз ўласиз. Ақл билан қарор чиқаринг», — деган Америка раҳбари.

Маълумот учун, Трамп ҲАМАСга биринчи марта таҳдид қилмаяпти. У декабрь ойида президентлик лавозимига киришгунга қадар ҳам, ҲАМАС гаровга олинганларни қўйиб юбормаса мамлакати «жаҳаннам»га айланишини айтган эди.