AQSH prezidenti Donald Tramp HAMASga Gʻazodagi barcha garovga olinganlarni ozod qilish uchun soʻnggi ogohlantirishni berdi. Bu haqida “BBC” nashri maʼlum qildi.

Qoʻshma Shtatlar shu vaqtga qadar HAMAS guruhi bilan toʻgʻridan-toʻgʻri aloqa qilishdan bosh tortib kelgan. Sababi AQSHning terrorchi tashkilotlar roʻyxatiga kiritilgan tuzilmalar bilan muhokama oʻtkazmaslik boʻyicha uzoq yillik siyosati mavjud edi.

“BBC” nashriga koʻra, Oq uy matbuot kotibi Karolin Leavitt AQSH garovga olinganlarni ozod qilish uchun HAMAS bilan bevosita muzokara olib borayotganini tasdiqlagan.

“Qoʻshma Shtatlar hamda HAMAS oʻrtasida muzokaralar boshlandi. AQSH bu muhokama oldidan Isroil hukumati bilan maslahatlashdi”, — degan Leavitt.

Kecha, 5-fevral kuni Amerika rahbari Donald Tramp oʻzining ijtimoiy tarmoqlardagi sahifasida HAMAS harakatiga nisbatan soʻngi ogohlantirish yuborganini maʼlum qildi.

“Soʻnggi tanlash imkoniyatingiz qoldi. Barcha garovga olgan Isroil fuqarolarini ozod qiling va oʻldirilgan asirlarning jasadlarini zudlik bilan vataniga qaytaring. Rad etsangiz bu siz uchun juda qimmatga tushadi. Faqat nosogʻlom odamlargina oʻldirilgan jasadlarni ushlab turadi – siz aynan shunaqasiz”, — degan Tramp.

Shuningdek u, Isroil hukumatiga HAMAS bilan mojarolarni yakunlash uchun barcha kerakli yordamlarni yuborayotganini ham qoʻshimcha qildi.

“Men Isroilga hamma narsani beraman, agar aytganimni qilmasangiz, birorta ham HAMAS aʼzosi omon qolmaydi. Men hozirgina sobiq garovda ushlab turilganlar bilan suhbatlashdim va shu qarorga keldim”, — deydi u.

Bundan tashqari, Tramp oʻz murojaatida Gʻazo xalqiga ham tahdidli chaqiriq yoʻllagan.

“Sizlarni ajoyib kelajak kutmoqda, ammo rahbariyatingiz garovdagilarni qoʻyib yuborishi shart. Ular buni rad qilishsa hammangiz oʻlasiz. Aql bilan qaror chiqaring”, degan Amerika rahbari.

Maʼlumot uchun, Tramp HAMASga birinchi marta tahdid qilmayapti. U dekabr oyida prezidentlik lavozimiga kirishgunga qadar ham, HAMAS garovga olinganlarni qoʻyib yubormasa mamlakati “jahannam”ga aylanishini aytgan edi.