Фото: “Халқ сўзи”

Ботир Мадиёров/“Халқ сўзи”. Фарғона вилоят ҳокимлиги ташаббуси билан Қувасой шаҳрининг “Қўчқорчи” МФЙ ҳудудида Ҳамид Олимжон ҳайкали ҳамда шу ҳудудда жойлашган хиёбонни реконструкция қилиш, ободонлаштириш ишларига киришилди.

Ушбу эзгу мақсадни амалга ошириш учун маҳаллий бюджетдан қарийб 1,5 миллиард сўм маблағ ажратилди. Лойиҳа доирасида йўллар ва йўлакларни ободонлаштириш, ҳудудга манзарали ва мевали дарахтлар экиш, суғориш тизимини яхшилаш ҳамда замонавий инфратузилма хизматларини йўлга қўйиш каби ишларини бажариш режалаштирилган. Шунингдек, ушбу хиёбонда жойлашган маҳалла фуқаролар йиғини биноси ҳам мукаммал таъмирланади.

— Бу юмушлар қувасойлик нуронийларнинг маслаҳати ва таклифлари асосида олиб борилаётир, — дейди “Қўчқорчи” МФЙ раиси Иқбол Турсунов. — Айни жараёнда ландшафт архитектураси асосида ҳудудда яшил хиёбон, мўъжаз кутубхона ва музей ҳам бунёд этилади.

Маҳалла нуронийларининг қайд этишича, мазкур ҳайкал 1982 йили давлат ва жамоат арбоби Шароф Рашидов ташаббуси билан барпо қилинган.