Фото: Олий Мажлис Қонунчилик палатаси Ахборот хизмати

Жорий йилнинг 18 – 21 ноябрь кунлари Россия Федерациясининг Нижний Новгород шаҳрида Ёшлар ҳукуматлари уюшмаси, Нижний Новгород вилоятининг Ёшлар ҳукумати ва Нижний Новгород вилояти ҳукуматининг корпоратив университети томонидан ташкил этилган «Ёшлар қарорлари» кейс-чемпионатининг ярим финал ва финал босқичлари бўлиб ўтди.

Mазкур кейс-чемпионатида турли давлатлардан жами 102 та жамоа, мингга яқин ёшлар иштирок этди. Ўзбекистон Республикаси Олий Мажлиси Қонунчилик палатаси ҳузуридаги Ёшлар парламенти раиси Шаҳноза Жолдасова, аъзолари Элбек Нурматов, Нодирбек Муродов, Отабек Шавкатов ва Aсқаржон Раҳматжоновдан иборат «Ренессанс» жамоаси ҳам биринчи босқичдан бошлаб мазкур тадбирда ёшларга оид давлат сиёсати, давлат бошқаруви тизими масалаларига тааллуқли бўлган лойиҳалари билан иштирок этиб, ярим финал босқичига йўлланма олди.

Нижний Новгородда ўтказилган кейс-чемпионатида Ўзбекистон ёшлари номидан қатнашган Ёшлар парламенти аъзолари ярим финал босқичида иштирок этган 20 та жамоа ичидан муносиб деб топилиб, энг кучли 10 та жамоа таркибидан 5-ўринни эгаллаб, финал босқичи танловида 3-ўринга сазовор деб топилди. Улар кубок ва диплом билан тақдирланди.