Фото: Прокуратура департаменти

Қорақалпоғистоннинг Қўнғирот туманида 2 222 литр дизель ёнилғиси талон-торож қилинишининг олди олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Унга кўра, ҳолат Бош прокуратура ҳузуридаги департаментнинг Қўнғирот тумани бўлими, ДХХ ва ИИБ ходимлари ҳамкорлигида ўтказилган тезкор тадбирда аниқланган.

«Т.Н.Б.» МЧЖнинг Қўнғирот филиали цех мудири З.М. ва бошқалар ўзаро тил бириктириб, ўзининг моддий жавобгарлигида бўлган 2 222 литр дизель ёнилғисини ҳеч қандай ҳужжатсиз филиалга тегишли ёқилғи ташувчи автомашинасида «К.Ш.» МЧЖга қарашли автомобилларга ёқилғи қуйиш шохобчасига ўтказиш мақсадида олиб келган.

Бироқ шу вақтда улар ДХХ ва ИИБ ходимлари томонидан ушланган, 2 222 литр дизель ёнилғиси эса ашёвий далил сифатида расмийлаштирилган.

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.