Foto: Prokuratura departamenti

Qoraqalpogʻistonning Qoʻngʻirot tumanida 2 222 litr dizel yonilgʻisi talon-toroj qilinishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.

Unga koʻra, holat Bosh prokuratura huzuridagi departamentning Qoʻngʻirot tumani boʻlimi, DXX va IIB xodimlari hamkorligida oʻtkazilgan tezkor tadbirda aniqlangan.

“T.N.B.” MChJning Qoʻngʻirot filiali sex mudiri Z.M. va boshqalar oʻzaro til biriktirib, oʻzining moddiy javobgarligida boʻlgan 2 222 litr dizel yonilgʻisini hech qanday hujjatsiz filialga tegishli yoqilgʻi tashuvchi avtomashinasida “K.Sh.” MChJga qarashli avtomobillarga yoqilgʻi quyish shoxobchasiga oʻtkazish maqsadida olib kelgan.

Biroq shu vaqtda ular DXX va IIB xodimlari tomonidan ushlangan, 2 222 litr dizel yonilgʻisi esa ashyoviy dalil sifatida rasmiylashtirilgan.

Mazkur holatlar yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) bilan jinoyat ishi qoʻzgʻatilib, tergov harakatlari oʻtkazilmoqda.