Жорий йилнинг 15 сентябрь куни Сенатнинг Аграр, сув хўжалиги масалалари ва экология қўмитаси мажлисида «Озиқ-овқат маҳсулотининг хавфсизлиги тўғрисида»ги Қонун дастлабки тарзда муҳокама қилинди.

Қайд этилганидек, Қонун билан озиқ-овқат маҳсулоти хавфсизлигини таъминлашнинг асосий принциплари белгиланиб, ваколатли давлат органларининг соҳадаги ваколатлари аниқ кўрсатилмоқда.

Озиқ-овқат маҳсулотининг хавфсизлиги бўйича идоралараро кенгаш фаолиятини ташкил қилиш белгиланмоқда. Шунингдек, озиқ-овқат маҳсулотининг хавфсизлигини таъминлашга қўйиладиган талаблар киритилмоқда.

Бундан ташқари, Қонунда халқаро талаблардан келиб чиқиб, озиқ-овқат маҳсулотининг хавфсизлиги соҳасида давлат назоратини амалга оширишнинг асослари, тартиби ва шакллари назарда тутилмоқда.

Импорт қилинаётган озиқ-овқат маҳсулотини давлат назоратини ўтказиш бўйича талаблар халқаро амалиётга кўра аниқ белгиланмоқда.

Таъкидланганидек, Қонуннинг қабул қилиниши орқали қишлоқ хўжалигида сифатли ва хавфсиз маҳсулот ишлаб чиқариш, пестицид ва ветеринария воситалари устидан назоратни кучайтириш, маҳсулотларни сертификатлаш ва экспорт жараёнларини соддалаштириш каби йўналишлар ҳуқуқий жиҳатдан тартибга солинади.

Мажлисда ер майдонларини фойдаланишга киритиш, яйлов ва ўрмон фонди ерларида озуқабоп экинлар етиштиришни ташкил этиш, чорвачилик тармоқларини ривожлантириш бўйича амалга оширилган ишлар ҳолатини Тошкент вилоятида ўрганиш якунлари ҳам муҳокама қилинди.

Вилоятда 1 миллиондан ортиқ чорва моллари боқилади, жорий йилнинг биринчи ярмида 165 минг тонна гўшт, 521 минг тонна сут, 709 млн дона тухум, 5,4 минг тонна балиқ, 170 тонна асал етиштирилган.

Чорвачиликка ихтисослашган туманларда аҳоли хонадонларига наслли қорамол, қўй, эчки ва парранда тарқатилиб, етиштирилган сут, гўшт ва тухум маҳсулотларини кооперация асосида сотиб олиш тизими йўлга қўйилган. Жумладан, 2023 йилда 13 та, 2024 йилда 7 та ва жорий йилда 3 та оилавий чорвачилик кооперациялари ташкил этилган.

Чорвачилик тармоқларида жорий йилда 40 та лойиҳа амалга оширилганлиги ҳисобига 161 нафар доимий ва мавсумий иш ўринлари яратилган. Йил якунига қадар 700 дан ортиқ иш ўринлари яратилиши режалаштирилган.

Иқлим ўзгаришининг салбий оқибатларнинг олдини олиш ҳамда чўлланишга қарши курашиш мақсадида ҳар йили 200 гектардан ортиқ майдонга кўчат экилиши йўлга қўйилган. Йилига 400 гектардан ортиқ майдонда дарахтзорлар яратилмоқда, тупроқ эрозияси, сув танқислиги, чўлланишнинг олдини олишга қаратилган ишлар олиб борилмоқда.

Муҳокама якунида Қўмитанинг тегишли қарорлари қабул қилинди.