Тошкент вилояти «Ғишткўприк» чегара божхона пости орқали юртимизга кириб келган фуқаро бошқарувидаги енгил автотранспорт воситаси божхона кўригидан ўтказилди.

Кўрик натижасида автоуловнинг юк хонасида йўловчи божхона декларациясида ёзиб кўрсатилмаган ва оғзаки сўровда маълум қилинмаган 600 дона ҳайвон шохлари борлиги аниқланди.

Бошқа бир ҳолатда, ушбу чегара божхона постига пиёда ҳолда кириб келган фуқаро ўзига тегишли бўлган қўл юклари божхона кўригидан ўтказилганида, 2 дона қопда оғзаки сўровда маълум қилинмаган ҳамда йўловчи божхона декларациясида ёзиб кўрсатилмаган 117 дона шохлар борлиги фош этилди.

Ўзбекистон Республикаси Фанлар академияси Зоология институти экспертиза хулосасига кўра аниқланган шохлар буғу турига мансублиги маълум бўлди. Ҳозирда ушбу ҳолат юзасидан дастлабки суриштирув ҳаракатлари олиб борилмоқда.

Айрим ҳайвонларнинг шох ва суяклари дунё бозорида харидоргир хомашё ҳисобланади. Шу сабаб, бунинг ортидан мўмай даромад орттиришни кўзлаган баъзи шахслар жонзотларга зарар етказиш билан бирга, божхона тартиб қоидаларини бузишга уринади.

Таъкидлаш жоиз, буғулар Евроосиёнинг мамлакатларида учрайди ва улар Ўзбекистон Республикасининг Қизил китоби рўйхатига киритилган.