Фото: Ҳасан Пайдоев, "Халқ сўзи".

Янги йил байрами болажонлар учун унутилмас таассуротларга бой ўтади. Бири-биридан ажойиб совғалар байрам чироқлари каби уларнинг қалбини нурга тўлдиради. 

Бу йил ҳам Ўзбекистон Республикаси Халқ таълими вазирлиги ва бир қатор ташкилотлар ҳамкорлигида Янги йил байрамини тўла-тўкис, юксак савияда ўтказиш, фарзандларимизга қувонч улашиш учун пухта ҳозирлик кўрилди. Қорақалпоғистон Республикаси ва барча вилоятлардаги Меҳрибонлик ва Мурувват уйлари ўғил-қизлари, “SOS — болалар маҳаллалари” тарбияланувчилари, ота-она қарамоғидан маҳрум болалар учун байрам тадбирлари ташкил этилмоқда.

Байрам арафасида Президент совғалари ортилган карвон йўлга отланди. Давлатимиз раҳбари номидан тақдим этиладиган совғалар ўтган йили болалар учун 11 номдаги ўқув қуроллари ва 17 номдаги ширинликлардан иборат эди. Бу йил эса Президент совғасидан махсус совғалар қопчиғи билан 6 номдаги ўқув қуроллари, 20 номдаги ширинликлар, юмшоқ ўйинчоқ ва шахмат жой олган. Президент совғалари Тошкент, Сирдарё ва Жиззах вилоятларига автотранспортда, Қорақалпоғистон Республикаси ва бошқа вилоятларга самолётлар орқали жорий йилнинг 26-28 декабрь кунлари жадвал асосида етказиб берилади.

Совғалар 29 декабрдан бошлаб Қорақалпоғистон Республикаси, вилоятлар ва Тошкент шаҳрида ташкил этиладиган “Президент арчаси” тадбирларида кичкинтойларга улашилади.

Дилшод КАРИМОВ

(“Халқ сўзи”).