Дональд Трамп Хитой етакчиси Си Цзиньпин, Россия президенти Владимир Путин ҳамда Шимолий Корея раҳбари Ким Чен Инни АҚШга қарши фитна уюштиришда айблади. Бу ҳақида «NBC News» нашри хабар берди.

Хабарда айтилишича, АҚШ президенти Дональд Трамп бу ҳақида ўзининг «Truth Social» тармоғидаги постида ёзган.

Унда айтилишича, Трамп Пекинда ўтказилган парадда намойиш қилинган ҳарбий техникалар кўргазмасидан сўнг пойтахт осмонига 80 минг кабутарларнинг қўйиб юборилиши тинчлик маъносини акс эттирса ҳам, бу томошанинг ортида даҳшатлироқ ҳаракатлар бўлиши мумкинлиги маълум қилган.

«Президент Си Цзиньпин, илтимос, Владимир Путин ва Ким Чен Инга самимий саломларимни етказинг. Сиз Америка Қўшма Штатларига қарши фитна уюштирасиз», — деб ёзган Трамп.

Россия президентининг ташқи сиёсат бўйича ёрдамчиси Юрий Ушаков Америка етакчисининг мазкур айбловини рад этди.

«Ҳеч ким ҳеч қандай фитна уюштирмаган. Ҳеч ким ҳеч нарса режалаштирмаган. Ҳеч кимда бундай фикр йўқ эди. Трампнинг бу баёнотида истеҳзо борлигига умид қиламан», — деган Ушаков давлат телевидениесидаги чиқишида.

Шунингдек, Дональд Трамп Иккинчи жаҳон уруши даврида АҚШ Хитойга катта ёрдам берганини ҳам қўшимча қилган.

«Кўплаб америкаликлар Хитойнинг ғалаба ва шон-шуҳратга эришиш йўлида ҳалок бўлди. Умид қиламанки, улар ҳақли равишда жасорат ва фидойиликлари учун доимо ҳурматда ва эсда қоладилар!», — деган Трамп.