2024/2025 ўқув йилида Ўзбекистондаги умумий ўрта таълим ташкилотлари сони 10 минг 943 тага етди. Бу кўрсаткич 1990/1991 ўқув йили бошида қайд этилган 8 минг 333 та мактабга нисбатан 2 минг 610 тага кўп бўлиб, кейинги 34 йилда умумий ўрта таълим тизимидаги инфратузилмавий ўсишни намоён этмоқда. Бу ҳақда Миллий статистика қўмитаси маълум қилди.

1990/1991 ўқув йили бошида 8 минг 333 та мактаб фаолият юритган бўлса, 2000/2001 ўқув йилига келиб бу рақам 9 минг 726 тага етган. 2010/2011 ўқув йили бошида эса мактаблар сони 9 минг 806 тани ташкил этди. Бу йилларда мактаблар сони босқичма-босқич кўпайиб боргани кузатилмоқда.

2020/2021 ўқув йили бошига келиб умумий ўрта таълим муассасалари сони 10 минг 181 тага етди. Кейинги йилларда бу рақам янада ортиб, 2021/2022 ўқув йили бошига 10 минг 289 та, 2023/2024 ўқув йилида эса 10 минг 750 тага етди. Бу йилларда давлат томонидан мактаблар қурилиши, таъмирланиши ва қайта жиҳозланишига катта эътибор қаратилди.

2024/2025 ўқув йили бошида қайд этилган 10 минг 943 та мактаб — мамлакат таълим соҳасида амалга оширилаётган ислоҳотлар ва инфратузилмавий ривожланишнинг натижасидир. Ушбу ўсиш таълим сифатини яхшилаш, болаларни тўлиқ қамраб олиш ва билим олиш имкониятларини кенгайтиришга хизмат қилмоқда.