2024/2025-oʻquv yilida Oʻzbekistondagi umumiy oʻrta taʼlim tashkilotlari soni 10 ming 943 taga yetdi. Bu koʻrsatkich 1990/1991-oʻquv yili boshida qayd etilgan 8 ming 333 ta maktabga nisbatan 2 ming 610 taga koʻp boʻlib, keyingi 34 yilda umumiy oʻrta taʼlim tizimidagi infratuzilmaviy oʻsishni namoyon etmoqda. Bu haqda Milliy statistika qoʻmitasi maʼlum qildi.

1990/1991-oʻquv yili boshida 8 ming 333 ta maktab faoliyat yuritgan boʻlsa, 2000/2001 oʻquv yiliga kelib bu raqam 9 ming 726 taga yetgan. 2010/2011-oʻquv yili boshida esa maktablar soni 9 ming 806 tani tashkil etdi. Bu yillarda maktablar soni bosqichma-bosqich koʻpayib borgani kuzatilmoqda.

2020/2021-oʻquv yili boshiga kelib umumiy oʻrta taʼlim muassasalari soni 10 ming 181 taga yetdi. Keyingi yillarda bu raqam yanada ortib, 2021/2022-oʻquv yili boshiga 10 ming 289 ta, 2023/2024-oʻquv yilida esa 10 ming 750 taga yetdi. Bu yillarda davlat tomonidan maktablar qurilishi, taʼmirlanishi va qayta jihozlanishiga katta eʼtibor qaratildi.

2024/2025-oʻquv yili boshida qayd etilgan 10 ming 943 ta maktab — mamlakat taʼlim sohasida amalga oshirilayotgan islohotlar va infratuzilmaviy rivojlanishning natijasidir. Ushbu oʻsish taʼlim sifatini yaxshilash, bolalarni toʻliq qamrab olish va bilim olish imkoniyatlarini kengaytirishga xizmat qilmoqda.