Ўзбекистонда қишлоқ хўжалиги соҳасини экологик тоза технологиялар асосида ривожлантиришга қаратилган инновацион лойиҳа амалга оширилмоқда. Лойиҳа Корея Республикасининг Корея юқори технологиялар институти (KIAT), Инновацион ривожланиш агентлиги, “Ўзавтосаноат“ АЖ ва Чирчиқ шаҳар ҳокимлиги ҳамкорлигида ташкил этилган.

Лойиҳанинг умумий қиймати 10 миллион АҚШ долларини ташкил этиб, у Корея Республикасининг ОDA дастури доирасида беғараз молиялаштирилмоқда. Унинг асосий мақсади — қишлоқ хўжалиги техникаларини экологик тоза сиқилган табиий газ (СТГ) ёқилғисига ўтказиш орқали атроф-муҳитга салбий таъсирни камайтириш ва иқтисодий самарадорликни оширишдан иборат.

Лойиҳа доирасида замонавий СТГ-4 газ балонли ускуналар жорий этилиб, махсус ўқув курслари ташкил этилади. Шунингдек, маҳаллий мутахассисларнинг малакасини ошириш мақсадида Siemens компаниясининг NX дастури асосида моделлаштириш ва лойиҳалаштириш бўйича ўқув машғулотлари ўтказилди.

Чирчиқ шаҳрида тадқиқот ва ишланмалар маркази учун бино қурилиши якунланган бўлиб, бу ерда кореялик мутахассислар билан ҳамкорликда замонавий ускуналарни жорий этиш ишлари давом этмоқда. Лойиҳа якунига қадар 50 дона СТГ ёқилғисида ишлайдиган турли қувватдаги қишлоқ хўжалиги техникаларини олиб келиш ва мутахассисларнинг малакасини ошириш режалаштирилган.

Ушбу лойиҳа Ўзбекистонда қишлоқ хўжалиги соҳасида замонавий инновацион ечимларни жорий этишда муҳим аҳамият касб этади.