АҚШнинг машҳур “Forbes” молиявий-иқтисодий журналида таниқли журналист ва таҳлилчи Кеннет Рапозанинг айни шундай сарлавҳали мақоласи чоп этилди.

“Ўзбекистон Президенти Шавкат Мирзиёевнинг шу йил 9 июль куни бўлиб ўтган муддатидан илгари мамлакат Президенти сайловидаги ҳал қилувчи ғалабаси давлат ижтимоий-сиёсий тузилиши ва иқтисодий янгиланишларни кучайтиришдан дарак бермоқда, — деб ёзади эксперт Кеннет Рапоза. — Шавкат Мирзиёев 2016 йилда биринчи марта президентликка сайланганидан бери Америка Қўшма Штатлар билан яқин муносабатларни ривожлантирди ва савдо шерикларини диверсификация қилиш учун ҳаракат қилмоқда”.

Мақолада ушбу лавозимни эгаллаганидан бери Президент Шавкат Мирзиёев Президент Доналд Трамп даврида Оқ уйга ташриф буюргани ва Вашингтон билан яқинроқ алоқаларни ривожлантираётгани қайд этилган.

Муаллиф мамлакатдаги ислоҳотларни таҳлил қилар экан, “Bluestone” инвестиция банки президенти Куинн Мартиннинг қуйидаги сўзлардан иқтибос келтирган: “Шавкат Мирзиёев кемани 180 градусга буриб янги йўналиш сари бошлади. У мамлакатнинг барча қўшнилари билан муносабатларни тиклади, фуқаролик жамиятини озод қилди ва иқтисодиётни очиқ ва замонавий қилиш дастури билан олдинга интилмоқда. Ҳали ҳам кўплаб муаммолар мавжуд, аммо бугунги кунга қадар эришилган ютуқлар жуда ажойиб”.

“Forbes”да босилган ушбу мақолада Ўзбекистон Президенти хусусийлаштиришни қамраб олувчи улкан иқтисодий ислоҳотларни қўллаб-қувватлаётгани алоҳида урғуланган. Таъкидланганидек, маҳаллий чакана инвесторларни жалб қилишга қаратилган “Халқ ИПО” ташаббуси ва муҳим давлат активларини сотиш очиқ, бозор иқтисодиёти сари сезиларли силжишини билдиради.

Журналда давлатимиз раҳбарининг март ойида эълон қилинган янги хусусийлаштириш режаси турли ҳудудлардаги 1000 та давлат корхонаси, 1500 гектар ер ва 10 миллион квадрат метрдан ортиқ кўчмас мулкни сотишни назарда тутиши ҳақида сўз юритилган.

“Ушбу чора-тадбирлар тўғридан-тўғри хорижий инвестициялар ҳажмини ошириш, Ўзбекистоннинг позитив обрўсини корпоратив сармояларни қабул қилувчи давлат сифатида кўтаришдир, — қайд этади муаллиф. — Шунингдек, Ўзбекистонинг етакчисининг фуқаролик жамияти эркинликлари ва коррупцияга қарши чораларга қаратилганлиги билан ажралиб турадиган бошқарув услуби жуда илғор. Мамлакат раҳбари Ўзбекистон учун муваффақият тарихига айланмоқда ва собиқ совет давридан қолган анъанавий сиёсатдан қайтмоқда”.

Америкалик таҳлилчи-журналист, шунингдек, ўтган йилнинг декабрь ойида Ўзбекистон Президенти ходимлар сонини қисқартириш ва бюрократияни сармоя, ўсиш ва сармояни рағбатлантиришга йўналтирилган яна бир тизимга айлантириш мақсадида доимий давлат аппаратида катта ўзгаришларни эълон қилганини маълум қилган.

“Forbes” Ўзбекистонда АҚШдан инвестициялар ҳажми ҳам ортиб бораётганига ҳам алоҳида эътибор қаратган. “Май ойида саноат газ ишлаб чиқарувчи “Air Products” ва “Chemicals of Allentown” компаниялари Ўзбекистон ҳукумати билан “Ўзбекнефтгаз” компаниясининг қайта ишлаш бўлинмасини сотиб олиш бўйича 1 миллиард долларлик инвестиция келишувини эълон қилди. Январь ойида “American Soybean” компанияси Ўзбекистонда илгари фойдаланилмаган ерларда соя етиштириш ва уларни соя ва соя уни учун қайта ишлашга 300 миллион доллардан ортиқ сармоя киритишга рози бўлгани хабар қилинган эди”, — деб таъкидланади материалда.

Мақола интиҳосида, “Келгуси бир неча йил жамоатчилик ишончини сақлаб қолиш учун жуда муҳим бўлади. Ўзбекистон ўз олдига қўйган мақсадларига эришиши керак. Одамлар аввалгидек ислоҳотнинг тез суръатларини кутишмоқда”, — деб ёзади Кеннет Рапоза.