Фото: AI

Суперлиганинг 2025 йилги мавсум ёзги трансферлар ойнасида 16 та жамоа 20 нафар янги легионер футболчини рўйхатдан ўтказди. Бу учун клублар мусобақа регламентига мувофиқ яхшигина тўловни амалга оширди. Қуйида шу тўлов нима асосида қилингани ва умумий сумма қанча бўлганини ўрганиб чиқамиз.

Аввало регламентдан ўрганиб чиқишимиз керак бўлган баъзи нарсаларга тўхталсак.

“Суперлига ва Пролига 2025” регламентининг 13.2 бандида легионер футболчиларни тоифаларга ажратиш ҳақида гап боради. Унга кўра, Ўзбекистон Суперлигаcига келган футболчилар 4 та: Олий, биринчи, иккинчи ва учинчи тоифаларга ажратилади.

• Сўнгги мавсумда Европa ТОП-7 чемпионати клубида ўйнаган ва камида 10 та ўйинда майдонга тушган футболчи, ёки Жаҳон ва Европа чемпионатининг финал босқичида тўп сурган футболчи олий тоифадаги легионер ҳисобланади. Олий тоифадаги легионерни рўйхатдан ўтказиш учун олдиндан белгиланган тўлов миқдорининг тенг ярми тўланади.

• 2005 йилдан кейин туғилган ва сўнгги 2 йилда ўз терма жамоасида камида 2 та ўйин ўтказган футболчи биринчи тоифадаги легионер ҳисобланади. Биринчи тоифадаги легионерлар учун ПФЛга тўлов қилинмайди. Эҳтиёж туғилса, биринчи тоифадаги легионерларни лимитдан ташқарида рўйхатдан ўтказишга ҳам рухсат берилади.

• FIFA рейтингида дастлабки 20 та ўринда турган терма жамоа сафида камида 1 та ўйин ўтказган 31 ёшдан кичик футболчи ёки исталган терма жамоада сўнгги 2 йил давомида камида 2 та расмий ўйин ўтказган футболчи иккинчи тоифадаги легионердир. Уни рўйхатдан ўтказиш учун олдиндан белгиланган таянч тўлов миқдори тўлиқ тўланади.

• Юқоридаги бандларга мос келмаган футболчи учинчи тоифадаги легионер бўлади. Учинчи тоифадаги легионер футболчиларни рўйхатдан ўтказиш учун олдиндан белгиланган тўлов миқдорининг 2 баравари тўланади.

Шунингдек, регламентнинг 13.6 бандида қуйидагилар қўшимча қилинган:

• Агар легионер узлуксиз кетма-кет тўрт мавсумни Ўзбекистон клубларида ўтказган бўлса ва 2025 йилги мавсум тартиб бўйича унинг кетма-кет бешинчи мавсуми бўлса, мазкур легионер учун тўлов амалга оширилмайди.

• Агар легионер бир клуб сафида кетма-кет иккинчи ёки ундан ортиқ мавсум давомида рўйхатдан ўтаётган бўлса, мазкур футболчи учун белгиланган тўлов 50 фоизга қисқартирилади.

Очиқ манбаларда регламентда айтилган таянч тўлов миқдори ҳақида аниқ маълумотлар йўқ. Аммо, футбол кишиларидан бу сумма 40 миллион сўм эканини аниқладик.

Энди шулар асосида Суперлига клублари легионерлари учун қанчадан тўлаганини кўриб чиқамиз:

“Андижон” жамоаси 3 нафар легионер футболчини Лига рўйхатидан ўтказди. Ҳар учала футболчи учинчи тоифада. Шу сабаб 240 миллион сўм тўлаган.

“Насаф” клубида ҳам худди шундай ҳолат, Қарши клуби ҳам 240 миллион сўм тўлаган.

“Машъал” ва “Сўғдиёна” жамоалари 2 нафардан легионер футболчини рўйхатдан ўтказди. Демак ҳар иккала клуб 160 миллион сўмдан тўлов қилган.

“Нефтчи” жамоаси 3 нафар футболчини Лига рўйхатидан ўтказди. Уларнинг 2 нафари учинчи, бири эса биринчи тоифадаги легионерлардир. Шу сабаб, жамоа 160 миллион сўм тўлаган.

“Бухоро”, “Хоразм”, “Динамо” ва “Қўқон-1912” жамоалари бир нафардан легионер футболчи билан шартнома имзолади. Ушбу тўрт клуб билан битим тузган футболчилар учинчи тоифали бўлсалар-да, улар Ўзбекистон чемпионатида бир неча йил ўйнашгани сабаб клублар ҳар бир футболчи учун 40 миллион сўмдан тўлаган.

“Пахтакор” билан шартнома имзолаган ҳимоячи иккинчи тоифадаги легионер ҳисобланади. Шу сабаб у учун 40 миллион сўм тўлов қилинган.

“Бунёдкор” ва “Навбаҳор” жамоалари 1 нафардан учинчи тоифадаги легионер футболчини Суперлигага олиб келди. Клублар ушбу трансферлар учун 80 миллион сўмдан тўлайди.

Демак, умумий сумма 1 миллиард 320 миллион сўмни ташкил этмоқда.