Ўзбекистон ҳудудига пневматик тўппонча олиб кирмоқчи бўлган хорижлик фуқаро «Ислом Каримов номидаги Тошкент халқаро аэропорти» тўхтатиб қолинди. Бу ҳақда «Тошкент-АЭРО» ихтисослаштирилган божхона комплекси матбуот хизмати маълум қилди.

Хабар қилинишича, 21 август куни соат 21:05 ларда «Ислом Каримов номидаги Тошкент халқаро аэропорти» чегара-божхона пости ходимлари томонидан «Санкт-Петербург-Тошкент» йўналиши бўйича учиб келган хориж фуқаросига тегишли бўлган 1 дона қора рангли йўл сумкаси божхона кўригидан ўтказилган.

Натижада юклар ичидан божхона назорати учун белгиланган тартибда тақдим этилмаган ва ички ишлар органларининг тегишли рухсатномаларисиз бўлган 1 дона пневматик қурол ва 1 дона пневматик қуролдан отиш учун мўлжалланган 290 дона шариклар (золдор) борлиги аниқланди.

Маълумот учун айтиш мумкинки, Ўзбекистон Республикасининг «Қурол тўғрисидаги қонунчилик такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш ҳақида» 2022 йил 31 майдаги ЎРҚ-772-сон Қонуни билан Ўзбекистон Республикасининг Маъмурий жавобгарлик тўғрисидаги кодексида фуқаровий ва хизмат қуролини ҳамда унинг ўқ-дориларини реализация қилиш учун лицензияга эга бўлган юридик шахсларнинг мансабдор шахслари томонидан қурол ва унинг ўқ-дорилари билан муомалада бўлиш қоидаларининг бузилиши учун алоҳида маъмурий жавобгарлик чоралари белгиланган.

Шу тариқа, чет эл фуқаросига калта стволли пневматик қуролнинг реализацияси тақиқланганлиги, бошқа турдаги пневматик қурол эса, фақат ички ишлар органларининг рухсатномалари асосида сотиб олиниши назарда тутилганлиги юзасидан раҳбарий тушунтиришлар берилган.

Аввалроқ, Санэпидқўмита «Маймун чечаги» касаллиги республикамиз ҳудудига кириб келиш эҳтимоли ҳақида муносабат билдирди.