Санитария-эпидемиология қўмитаси Республикамиз аҳолисининг аксарият қисмида маймун чечакка қарши жамоавий иммунитет мавжудлигини билдирди ва унинг мамлакатимизга кириб келиш эҳтимолини жуда паст баҳолади. Бу ҳақда Санэпидқўмита ахборот хизмати хабар берди.

Маълум бўлишича, «Маймун чечаги» вирусли инфекция бўлиб, организмнинг умумий заҳарланиши ҳамда терида ўзига хос тошмалар тошиши билан кечади. Бу касаллик қайд қилинаётган Европа мамлакатларида беморлар ва мулоқотда бўлганларга нисбатан яккалаш чоралари олиб борилмоқда, эпидемияга қарши амалга оширилаётган чора-тадбирлар эса тўлиқ самара бермоқда.

««Маймун чечаги» касаллиги республикамиз ҳудудига кириб келиши эҳтимоли жуда кам. Негаки, мамлакатимизда истиқомат қилаётган 1980 йилдан аввал туғилган катта ёшдагилар чечак (халқ тилида чин чечак) касаллигига қарши тўлиқ эмланган. Айнан шу қатламда жамоавий иммунитет мавжуд, боиси чин чечакка қарши эмлашдан кейин ҳосил бўлган иммунитет маймун чечагига қарши ҳам ишлайди ва касалликнинг кенг тарқалиш хавфини пасайтиради», дейилади хабарда.

Қайд этилишича, ЖССТ Европа иттифоқи маълумотларига кўра маймун чечаги эпидемияси COVID-19 пандемияси даражасида глобал муаммо туғдирмаслигини билдирган. Ташкилот Европа минтақавий бюроси директори Ханс Клюге дунёнинг қатор мамлакатларида Мпох (маймун чечаги) вируси тарқалиши билан боғлиқ эпидемик вазият юзасидан баёнот берар экан, ваҳимага берилишга ҳожат йўқ эканлигини таъкидлаган.

Шунга қарамасдан. касаллик тарқалишини олдини олиш мақсадида бир қатор чораларни ҳам кўриб қўйилиши лозим, деб ҳисоблади қўмита. Биринчидан, «маймун чечаги касаллиги» бўйича эпидемиологик ҳолат нохуш давлатларга сафарларни чеклаш; иккинчидан, иш юзасидан хизмат сафарига борилган тақдирда, ёввойи ҳайвонлар ва кемирувчилар (маймунлар, каламушлар) билан мулоқотда бўлмаслик; учинчидан, жамоат жойларига чиқишда шахсий гигиенага қатъий риоя қилиш талаб қилинади.

Бундан ташқари, тана ҳарорати кўтарилган ёки тошмалар тошган йўловчилар билан бирга ҳаракатланишга тўғри келганда имкон қадар санитария-муҳофаза (ижтимоий) масофани сақлаш, тиббий ниқоблардан фойдаланиш, қўлларни зарарсизлантирувчи воситалар билан ишлов бериш керак. Шунингдек, жамоат транспортларида тиббий ниқоблардан фойдаланиш, транспортдан тушгандан сўнг қўлларни зарарсизлантирувчи воситалар билан тозалаш тавсия этилади.

Аввалроқ, «Барселона»нинг ўтган мавсумдаги энг яхши футболчиси жамоа билан шартномани бекор қилганди.