Фото: Goal.com

Испаниянинг «Барселона» клуби футболчиси Илкай Гюндоган жамоа билан шартномасини бекор қилиб, «Манчестер Сити»га қайтадиган бўлди. Бу ҳақда машҳур Фабрицио Романо хабар берди.

Маълум қилинишича, «Манчестер Сити» германиялик ярим ҳимоячини жамоага қайтариш бўйича келишув устида ишламоқда. 33 ёшли футболчи Пеп Гвардиола жамоасининг бу мавсумдаги муҳим бўлаги бўлиши ҳам кутиляпти.

Қайд этиш керакки, 2023 йилда Илкай «Сити»ни тарк этиб, «Барселона»га эркин агент сифатида келиб қўшилганди. У 2023-2024 йилда жамоа билан 51 та ўйинда майдонга тушиб, 5 та гол ва 14 та узатма амалга оширди. У ўтган мавсумда жамоанинг энг яхши футболчилардан деб топилган.

«Барселона» молиявий қийинчиликлар сабабли Дани Олмо каби янги ўйинчиларни рўйхатдан ўтказишда қийинчиликларга дуч келмоқда. Шу сабабли ҳам Гундоган каби юқори маош оладиган футболчини қўйиб юбориш вазиятни енгиллаштириши мумкин. Амалдаги шартнома 2026 йилнинг ёзигача эди.

Аргентиналик ҳужумчи Алвареснинг «Атлетико Мадрид»га кетиши ва норвегиялик вингер Оскар Боббнинг жиддий жароҳати немис футболчисининг қайтишига шароит яратиб берган. Гюндоган дастлаб «Манчестер Сити»га 2016 йилда Дортмунднинг «Боруссия»сидан 20 миллион фунт стерлинг эвазига ўтган эди.

Клубдаги етти йиллик фаолияти давомида у 304 та ўйинда майдонга тушиб, 60 та гол урган. Илкай «Сити»даги фаолияти давомида 14 та йирик совринни қўлга киритганди.

Аввалроқ, 18 ёшли ўзбекистонлик шахматчи Магнус Карлсенни 3 дақиқада таслим қилганди.