Жаҳон интеллектуал мулк ташкилоти (WIPO) томонидан ҳар йили эълон қилинадиган Глобал инновация индекси (ГИИ)нинг 2025 йилги рейтингига кўра, Ўзбекистон 139 та давлат орасида 79-ўриндан жой олди.

Маълумот учун, Ўзбекистон индексга илк бор 2015 йилда қўшилган бўлиб, ўша йилда 141 мамлакат ичида 122-ўринни эгаллаган. 2024 йилда эса 132 давлат орасида 83-поғонада қайд этилган эди.

Янги ҳисоботда Ўзбекистон ўз даромад гуруҳи — қуйи ўрта даромадли мамлакатлар ичида Вьетнам, Филиппин, Марокаш ва бошқалар қаторида 7-ўринни эгаллади (2024 йилда — 10-ўрин). Марказий ва Жанубий Осиё минтақасида эса Ҳиндистон ва Эрондан кейин 3-ўринни қайд этди (2024 йилда — 4-ўрин).

Глобал индекс 2 та субиндекс — инновация ресурслари (innovation input) ва инновация натижалари (innovation output) ҳамда 7 та йўналиш гуруҳидан иборат. Ўзбекистон бу йил ресурслар бўйича 69-ўрин, натижалар бўйича эса 92-ўринга жойлашди.

Жами 78 та индикатор бўйича баҳоланган мамлакат 36 кўрсаткичда натижани яхшилаган, 7 тасида ўзгариш кузатилмаган, 33 тасида пасайиш қайд этилган.

Йўналишлар кесимида “инсон капитали ва илмий тадқиқотлар” (+12), “инфратузилма” (+1), “бозор ривожланиши” (+4), “билим ва технология маҳсулотлари” (+10) бўйича ўсиш қайд этилган. Шу билан бирга, “бизнесни ривожлантириш” (-4) ва “ижодий маҳсулотлар” (-1)да пасайиш бўлган, “бошқарув институтлари сифати” эса ўзгаришсиз қолган.