Фарҳод ЭСОНОВ/«Халқ сўзи». Президентимиз Шавкат Мирзиёев топшириғига мувофиқ, қўшни афғон аҳолисини бепул тиббий кўрикдан ўтказиш, зарур озиқ-овқат ҳамда дори-дармон воситалари шаклидаги инсонпарварлик ёрдами «Саломатлик» поезди билан Афғонистон халқига етказилди.

Жами 9 вагондан иборат инсонпарварлик ёрдами 30 турдан ортиқ зарур озиқ-овқат маҳсулотлари, дори-дармон воситалари ва тиббий буюмлар Ҳайратон шаҳрида Сурхондарё вилояти ҳокими, Ташқи ишлар ҳамда Транспорт вазирлиги мутасаддилари, Балх вилояти губернатори ўринбосари Нурулло ходи Абу Идрис ва бошқа расмийлар иштирокида топширилди.

Тантанали маросимда кўрсатилаётган беғараз ёрдам ва икки халқ ўртасида дўстлик, яқин қўшничилик муносабатларини янада мустаҳкамлашга алоҳида эътибор қаратаётган Президентимизга чуқур миннатдорлик билдирилди.

«Саломатлик» тиббий-санитар ёрдам поездида борган ўзбекистонлик бир гуруҳ турли мутахассислардан иборат шифокорлар жорий йилнинг 25-30 декабрь кунлари Балх вилоятида афғон фуқароларини бепул тиббий кўрикдан ўтказади.