Осиё тараққиёт банки (ОТБ) Ўзбекистонга 233,1 млн доллар миқдорида қарз ажратишни маъқуллади. Маблағлар Марказий Осиё минтақавий иқтисодий ҳамкорлик (CAREC) доирасидаги 2-коридорнинг муҳим қисми бўлган йўлни модернизация қилишга йўналтирилади.

Лойиҳа доирасида Ғузор–Бухоро–Нукус–Бейнеу (А-380) автомагистралининг Қорақалпоғистон ҳудудидаги 87 км қисми реконструкция қилинади. Шу жумладан, Тўрткўл–Элликқалъа–Беруний йўналишида 75 км янги айланма йўл қурилади, мавжуд А-380 йўлининг 12 км қисми янгиланади.

Лойиҳага иқлим барқарорлигини таъминлайдиган элементлар киритилган: цемент-бетон қопламаси, баландроқ йўл тўшамалари, замонавий дренаж тизимлари ва иқлим ўзгариши ҳамда кескин об-ҳаво ҳолатларига қарши туриш имконини берувчи технологиялар.

Шунингдек, ОТБ интеллектуал транспорт тизимлари ва ҳаракатланишда автоматик тарозилар ўрнатилишини қўллаб-қувватлайди. Бу йўлда ҳаракат назоратини кучайтириш, юк нормаларини таъминлаш ва йўлларни сақлаш харажатларини камайтиришга ёрдам беради.

Йўл коридори бўйлаб 5 та дам олиш ва сервис масканлари қурилади. У ерда электромобиллар учун зарядлаш станциялари, шунингдек, хотин-қизлар эҳтиёжларига йўналтирилган хавфсиз ва қулай шарт-шароитлар яратилади.

Лойиҳанинг умумий қиймати 293,7 млн долларни ташкил этиб, шундан 60,6 млн доллари Ўзбекистон ҳукуматининг улушига тўғри келади.