Osiyo taraqqiyot banki (OTB) Oʻzbekistonga 233,1 mln dollar miqdorida qarz ajratishni maʼqulladi. Mablagʻlar Markaziy Osiyo mintaqaviy iqtisodiy hamkorlik (CAREC) doirasidagi 2-koridorning muhim qismi boʻlgan yoʻlni modernizatsiya qilishga yoʻnaltiriladi.

Loyiha doirasida Gʻuzor–Buxoro–Nukus–Beyneu (A-380) avtomagistralining Qoraqalpogʻiston hududidagi 87 km qismi rekonstruksiya qilinadi. Shu jumladan, Toʻrtkoʻl–Ellikqalʼa–Beruniy yoʻnalishida 75 km yangi aylanma yoʻl quriladi, mavjud A-380 yoʻlining 12 km qismi yangilanadi.

Loyihaga iqlim barqarorligini taʼminlaydigan elementlar kiritilgan: sement-beton qoplamasi, balandroq yoʻl toʻshamalari, zamonaviy drenaj tizimlari va iqlim oʻzgarishi hamda keskin ob-havo holatlariga qarshi turish imkonini beruvchi texnologiyalar.

Shuningdek, OTB intellektual transport tizimlari va harakatlanishda avtomatik tarozilar oʻrnatilishini qoʻllab-quvvatlaydi. Bu yoʻlda harakat nazoratini kuchaytirish, yuk normalarini taʼminlash va yoʻllarni saqlash xarajatlarini kamaytirishga yordam beradi.

Yoʻl koridori boʻylab 5 ta dam olish va servis maskanlari quriladi. U yerda elektromobillar uchun zaryadlash stansiyalari, shuningdek, xotin-qizlar ehtiyojlariga yoʻnaltirilgan xavfsiz va qulay shart-sharoitlar yaratiladi.

Loyihaning umumiy qiymati 293,7 mln dollarni tashkil etib, shundan 60,6 mln dollari Oʻzbekiston hukumatining ulushiga toʻgʻri keladi.