Тошкент шаҳри Учтепа туманида яшовчи 23 ёшли фуқаро Ф.А. ИИОга мурожаат қилиб, банк картасидан 600.000 сўм пуллар фирибгарлик йўли билан ўзлаштирилганлигини маълум қилган.

Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида, мазкур жиноятни Тошкент вилояти Оҳангарон туманида яшовчи 19 ёшли У.У. содир этганлиги аниқланди.

Унга кўра, У.У. “Olx” савдо платформасида “Арзон китоблар” номли сохта эълон жойлаштириб, ушбу эълонга ишонган Ф.А.ни алдаб, у харид қилган китобларни етказиб беришини ваъда қилиб, ишончига кириш орқали олдиндан 600.000 пулларни ўзининг банк картасига ўтказдириб олгандан сўнг, китобларни манзилга етказмасдан алоқани узиб қўйган.

Мазкур ҳолат юзасидан Ўзбекистон Республикаси ЖКнинг 168-моддаси 3-қисми билан жиноят иши қўзғатилиб, У.У.нинг содир этилиб, фош этилмай қолган бошқа шу турдаги жиноятларга алоқадорлигини текшириш мақсадида тергов, тезкор-қидирув ҳаракатлари давом эттирилмоқда.

Қонунга мувофиқ, Ўзбекистон Республикаси Жиноят кодексининг 168-моддаси 3-қисмидаги жиноий хатти-ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.