Фото: Акмал Муҳаммадев/«Халқ сўзи»

Олий таълим, фан ва инновациялар вазирлигида 1 октябрь – Ўқитувчи ва мураббийлар куни муносабати билан байрам тадбири бўлиб ўтди. Тадбирни вазир Қўнғиротбой Шарипов очиб, таълим тизимида фидокорона меҳнат қилаётган барча устоз ва мураббийларни самимий табриклади. У педагоглик касбининг юксак масъулият ва катта шараф эканини таъкидлаб, таълим ҳамда илм-фан ривожига ҳисса қўшаётган ўқитувчилар ва олимларга миннатдорлик билдирди.

Маросимда ўз касбига садоқат билан хизмат қилаётган профессор-ўқитувчилар, тажрибали педагоглар, илм-фан тараққиётига муносиб ҳисса қўшаётган олимлар ҳамда тизимда фидокорона фаолият юритаётган вазирлик ходимлари тақдирланди. Уларга «Олий таълим аълочиси» ва «Ўрта махсус ва профессионал таълим аълочиси» кўкрак нишонлари топширилди.

Мукофот соҳиблари ҳозирда педагогларга кўрсатилаётган юксак эътибор ва эътирофни халқимизнинг устоз ва мураббийларга бўлган ҳурматининг ёрқин ифодаси сифатида баҳолаб, ушбу қадриятни амалда ҳис этаётганларидан миннатдорлик изҳор этдилар.

Тадбирнинг бадиий қисми кўтаринки руҳда ўтди. Ўзбекистон Республикаси халқ артисти, эл суйган санъаткор Женисбек Пиязов куй-қўшиқлари билан иштирокчиларга байрамона кайфият улашди.