Foto: Akmal Muhammadev/“Xalq soʻzi”

Oliy taʼlim, fan va innovatsiyalar vazirligida 1-oktyabr – Oʻqituvchi va murabbiylar kuni munosabati bilan bayram tadbiri boʻlib oʻtdi. Tadbirni vazir Qoʻngʻirotboy Sharipov ochib, taʼlim tizimida fidokorona mehnat qilayotgan barcha ustoz va murabbiylarni samimiy tabrikladi. U pedagoglik kasbining yuksak masʼuliyat va katta sharaf ekanini taʼkidlab, taʼlim hamda ilm-fan rivojiga hissa qoʻshayotgan oʻqituvchilar va olimlarga minnatdorlik bildirdi.

Marosimda oʻz kasbiga sadoqat bilan xizmat qilayotgan professor-oʻqituvchilar, tajribali pedagoglar, ilm-fan taraqqiyotiga munosib hissa qoʻshayotgan olimlar hamda tizimda fidokorona faoliyat yuritayotgan vazirlik xodimlari taqdirlandi. Ularga “Oliy taʼlim aʼlochisi” va “Oʻrta maxsus va professional taʼlim aʼlochisi” koʻkrak nishonlari topshirildi.

Mukofot sohiblari hozirda pedagoglarga koʻrsatilayotgan yuksak eʼtibor va eʼtirofni xalqimizning ustoz va murabbiylarga boʻlgan hurmatining yorqin ifodasi sifatida baholab, ushbu qadriyatni amalda his etayotganlaridan minnatdorlik izhor etdilar.

Tadbirning badiiy qismi koʻtarinki ruhda oʻtdi. Oʻzbekiston Respublikasi xalq artisti, el suygan sanʼatkor Jenisbek Piyazov kuy-qoʻshiqlari bilan ishtirokchilarga bayramona kayfiyat ulashdi.