Одамларни вакцинация жараёнларига ундаш учун атайлаб касаллик кўпайиши бўрттириб кўрсатиляптими? 

АОКАда ўтказилган матбуот анжуманида мазкур саволга Санитария-эпидемиологик осойишталик ва жамоат саломатлиги хизмати раҳбари ўринбосари Нурмат Отабеков жавоб берди. 

«Ҳозирги кунда шунақа фикрлар ҳам олға суриляпти, атайлаб вакцинани харид қилиш учун ёки олиб келинган вакцина билан эмлашга аҳолини жалб қилиш учун атайин касаллик бўрттириб кўрсатиляпти деган фикрлар олға суриляпти, аслида бу гапларда ҳеч қандай мантиқ йўқ, биз бундан бирор мақсад кутаётганимиз йўқ.

Агар аҳамият берган бўлсангиз, касалликнинг болалар орасида қайд этилиши ошаяпти, лекин биз аҳолининг 18 ёшдан юқори бўлган қисмини эмлашни режалаштиряпмиз. 

Ҳаммани қизиқтираётган савол - карантин яна кучайтириладими?Карантин чекловларига келсак, бундай бўлишига ўзимиз сабабчимиз. Биз ҳали бекор қилинмаган ниқоб тақиш, антисептик воситалардан фойдаланиш, масофа сақлаш қоидаларини унутиб қўймасак, вазиятни кескинлашувига асос йўқ. Биз ҳаддан ортиқ хотиржамликка берилиб кетдик, бу касаллик қайд этилиши билан боғлиқ статистик рақамларни ортиб боришида намоён бўляпти», деди Нурмат Отабеков.

Инобат АҲАТОВА,

«Халқ сўзи»