2025 йил 15 июндан 13 июлгача АҚШ мезбонлик қиладиган клублар ўртасидаги жаҳон чемпионатига қуръа ташланди. Турнир янги форматда ўтказилади ва дунё бўйлаб энг кучли клубларни ўзида йиғади. Чемпионатда 32 та жамоа 8 та гуруҳга бўлинган ҳолда куч синашади.

«A» гуруҳида «Палмейрас» (Бразилия), «Порту» (Португалия), «Ал Аҳли» (Миср) ва «Интер Майами» (АҚШ) жамоалари тўқнаш келади. Бу гуруҳда асосий эътибор «Палмейрас» ва «Порту» ўртасидаги беллашувга қаратилган. Шунингдек, Лионел Месси бошчилигидаги «Интер Майами» мухлислар учун катта қизиқиш уйғотиши аниқ. Африканинг етакчи клуби «Ал Аҳли» ҳам ўз кучини намоён этишга интилади.

«B» гуруҳида «ПСЖ» (Франция), «Атлетико» (Испания), «Ботафого» (Бразилия) ва «Сиэтл Саундерс» (АҚШ) рақобатлашади. Париж жамоаси Килиан Мбаппе жамоани тарк этгач, Баркола, Дембеле ва Витиния бошчилигида чемпионлик учун асосий даъвогар ҳисобланади. «Атлетико»нинг тажрибаси ва интизоми ушбу гуруҳни янада қизиқарли қилади. Шунингдек, «Ботафого» ва «Сиэтл Саундерс» ҳам ўз кучли томонларини кўрсатиши кутилмоқда.

«C» гуруҳи «Бавария» (Германия), «Бенфика» (Португалия), «Бока Хуниорс» (Аргентина) ва «Окленд Сити» (Янги Зеландия) жамоаларини бирлаштирган. «Бавария» ва «Бенфика» ўртасидаги рақобат, айниқса, диққатга сазовор. Бунинг устига, «Бока Хуниорс» Аргентина футболи вакиллари сифатида кўпчиликнинг эътиборида. Янги Зеландиянинг «Окленд Сити» жамоаси эса кутилмаган натижаларни қайд этишга ҳаракат қилади.

«D» гуруҳида «Фламенго» (Бразилия), «Челси» (Англия), «Леон» (Мексика) ва «Эсперанс» (Тунис) ўйинлари ўтади. «Фламенго» ва «Челси»нинг учрашуви мухлислар учун катта шоу бўлиши кутилмоқда. Мексиканинг «Леон» жамоаси ҳам анъанавий равишда жуда курашувчан. «Эсперанс» эса Африка шарафини муносиб ҳимоя қилишига ишониляпти.

«E» гуруҳи «Ривер Плейт» (Аргентина), «Интер» (Италия), «Монтеррей» (Мексика) ва «Урава Редс» (Япония)дан иборат. Аргентинанинг машҳур клуби «Ривер Плейт» ушбу гуруҳда фаворит ҳисобланади. «Интер» ушбу гуруҳда яққол етакчи сифатида кўрилаётган бўлса-да, «Ривер Плейт» лучли рақобат уйғотиши кутилмоқда. «Монтеррей» ва «Урава Редс» ҳам ўз мухлисларини хурсанд қилишга ҳаракат қилади.

«F» гуруҳида «Флуминенсе» (Бразилия), «Боруссия Дортмунд» (Германия), «Улсан» (Жанубий Корея) ва «Мамелоди Сандаунс» (ЖАР) иштирок этади. Бу гуруҳда яққол фаворит жамоа йўқ дейиш ҳам мумкин. «Боруссия Д»нинг имкониятлари юқори бўлса ҳам, олдиндан ҳеч нима деб бўлмайди. «Флуминенсе» Бразилия футболи шарафини ҳимоя қилади. Жанубий Корея ва ЖАР клублари кутилмаган натижаларни яратишга имконияти ҳам салоҳияти ҳам етади.

«Г» гуруҳида «Манчестер Сити» (Англия), «Ювентус» (Италия), «Видад» (Марокаш) ва «Ал Айн» (БАА) жамоалари ўзаро беллашади. «Манчестер Сити» ушбу мусобақада фаворитлардан бири сифатида кўрилмоқда. «Ювентус» гарчи инқирозли даврда бўлса ҳам, кучли рақобат қила олади. «Видад» ва «Ал Айн» эса мусобақада ўз омадини синаб кўради.

«Ҳ» гуруҳида «Реал Мадрид» (Испания), «Залцбург» (Австрия), «Ал Ҳилол» (Саудия Арабистони) ва «Пачука» (Мексика) жой олган. Испаниянинг «Реал» жамоаси ва “Осиёнинг ҳозирдаги энг кучли клуби саналган «Ал Ҳилол» ўртасидаги баҳс номлар жангига айланиб кетиши мумкин. «Залцбург»нинг ёш иқтидорлари катта кутилмалар билан майдонга тушади. «Ал Ҳилол» ва «Пачука»нинг иштироклари мусобақага янада қизиқиш қўшади.

Янги форматдаги ушбу мусобақа дунё футбол мухлислари учун катта қизиқиш уйғотмоқда. АҚШда ўтадиган ушбу турнир футболда янги саҳифа ёзишга хизмат қилиши аниқ. Ҳар бир гуруҳдаги учрашувлар мухлисларга унутилмас таассуротлар тақдим этиши кутиляпти.