Қудратилла НАЖМИДДИНОВ/«Халқ сўзи». Мамлакатимиз пойтахтини водий билан боғловчи “Фарғона ҳалқа йўли”нинг бир қисми Наманган вилояти ҳудудидан ўтган бўлиб, айни пайтда ундан бир кеча-кундузда ўртача 20 мингдан зиёд транспорт воситалари қатнамоқда. Кейинги пайтларда ҳаракат оқимининг жадал ортиши натижасида трассанинг ўтказиш қобилияти талаб даражасидан ортда қола бошлади. Шундан келиб чиқиб 75 километр масофадаги “Пунгон – Наманган” йўлини реконструкция қилиш бўйича ишлаб чиқилган лойиҳа масалага ечим топади. Яқинда ижросига киришилган 368 миллион доллар қийматидаги ушбу лойиҳа Хитойнинг “CITIC Construction” компанияси томонидан амалга оширилмоқда.

“Молиялаштириш-лойиҳалаш-қуриш” тамойилига асосланган автойўлни реконструкциялаш ишлари тўрт йилга мўлжалланган бўлиб, айни жараёнда қатнов тартибини икки тасмалидан тўрт тасмали цемент бетон қопламага ўтказиш, юк кўтариш қобилиятини амалдаги 10 тоннадан 13 тоннага ошириш, транспорт воситалари кунлик ҳаракат жадаллигини ўртача 40 мингтага етказиш кўзда тутилган.

— Минтақа учун муҳим аҳамиятга эга бўлган йўлнинг реконструкция қилиниши, биринчи навбатда, унинг хавфсиз барқарор объектга айланишини таъминлайди, — дейди Наманган вилояти автомобиль йўллари бош бошқармаси бошлиғи вазифасини бажарувчи Тоҳиржон Ўрозов. — Шу мақсадда лойиҳа тарҳига мавжуд 14 та кўприкни қайта қуриш, кўплаб ер ости ва ер усти ўтказгичларни барпо этиш ҳам киритилган.

Айни пайтда Хитой компанияси йўлсозлари ҳамкорлигида олиб борилаётган реконструкция ишлари жадал тус олган. Қишнинг совуқ об-ҳавосига қарамай мавжуд техника воситалари ва таъмирчилар кучидан унумли фойдаланилаётгани кунлик график юмушлари тўла бажарилишини таъминламоқда.