Қудратилла Нажмиддинов/«Халқ сўзи». Жорий йилнинг баҳорида Наманганда ўтказилган 63-Халқаро гуллар фестивалига келган Жанубий Корея Республикаси санъат намоёндалари анжуманда ўзининг миллий бадиий дастурини намойиш қилган эди. Айни жараёнда гуллар шаҳри ва Буео-Гун вилоятлари ўртасида маданият соҳасида ҳамкорлик ўрнатиш юзасидан меморандум ҳам имзоланган. Наманган вилоят мусиқали драма театри жамоаси октябрь ойининг биринчи ҳафтасида Буео-Гунда ижодий сафарда бўлди. Ҳамюртларимиз бу ерда корейсларнинг 70- Беакже миллий фестивалида иштирок этди.

– Фестиваль қатнашчиларига махсус театрлаштирилган дастурни туҳфа этдик, – дейди театр директорининг ўринбосари Нуриддинхўжа Абдураҳимов. – Улар томонидан ижро этилган «О ялли, ялли» , «Наманганнинг олмаси» тароналари, миллий қўшиқ ва лапарлар ҳамда «Майсаранинг иши» , «Боғбон қиз» спектаклларидан намойиш этилган парчалар, доира ва карнай садолари олқишлар билан кутиб олинди.

Корейс миллий фестивали, унда ижро этилган ранг-баранг дастурлар наманганлик санъаткорларда ҳам катта таассурот қолдирди. Ижодий алоқаларни янада кенгайтириш, янги спектакллар алмашиш бўйича янги режалар белгилаб олинди.