Франция пойтахтида ўтказилаётган ёзги Олимпиада ўйинларида ўзбек спортчилари ўз иштирокларини давом эттиряпти.

Дзюдо бўйича Ўзбекистон терма жамоаси аъзоси, жаҳон чемпиони Музаффарбек Тўрабоев «Париж-2024» ёзги Олимпиада ўйинларида иккинчи ғалабасини қўлга киритди.

Биринчи беллашувда қозоғистонлик Нурлихан Шарханни енгган юртдошимиз чорак финалда нидерландиялик Михаил Коррелни ҳам соф ғалаба — иппон усули билан мағлубиятга учратди.

Энди у финал йўлланмаси учун озарбайжонлик Зелим Котсоев қарши татамига чиқади. Қайд этиш керакки, Зелим жуда кучли курашчилардан ҳисобланади. У дзюдо бўйича Озарбайжон терма жамоаси аъзоси, 2024 йилги жаҳон чемпиони, 2023 йилги Европа чемпиони ҳисобланади.

Шунингдек, озарбайжонлик спортчи 2022 ва 2023 йиллардаги жаҳон чемпионати, 2018 , 2020 ва 2021 йиллардаги Европа чемпионатларининг бронза медали совриндори ҳамдир.

Аввалроқ, япониялик яна бир дзюдочи Ирисхон Қурбонбоевани биринчи босқичда турнирдан чиқариб юборганди.