Бугун, 7 ноябрь куни Тошкент шаҳрида «Давлат бошқарувида аёлларнинг роли: Ўзбекистон келажагини шакллантираётган ислоҳотлар овози» мавзусида халқаро конференция бўлиб ўтди.

Ўзбекистон Республикаси Бошқарув самарадорлиги агентлиги ташаббуси билан ташкил этилган тадбирда Олий Мажлис Сенати аъзолари, Қонунчилик палатаси депутатлари, Хотин-қизларнинг жамиятдаги ролини ошириш, гендер тенглик ва оила масалалари бўйича республика комиссияси ва халқаро ташкилотлар вакиллари ҳамда фаол раҳбар аёллар иштирок этди.

Тадбирни очар экан, Сенат Раиси Т.Нарбаева хотин-қизларнинг сиёсий, ижтимоий ва иқтисодий жараёнлардаги фаоллигини ошириш давлатимизнинг устувор йўналишларидан бири эканлигини таъкидлади.

Жумладан, 4 йил давомида фаолият юритаётган «Раҳбар аёллар мактаби» орқали 400 нафардан ортиқ хотин-қизлар замонавий бошқарув ва етакчилик кўникмаларини ўзлаштирди. Бугунги кунда захирага киритилган аёл кадрлар ўз салоҳияти, ташаббускорлиги ва фидойилиги билан ажралиб турибди.

Шу билан бирга, мамлакатимизда гендер тенгликни таъминлаш бўйича кенг кўламли ишлар амалга оширилаётгани қайд этилди. Сўнгги саккиз йилда хотин-қизлар ҳуқуқларини ҳимоя қилишга қаратилган 110 дан ортиқ норматив-ҳуқуқий ҳужжат қабул қилинди. Қабул қилинаётган қонун лойиҳаларининг гендер экспертизадан ўтказилиши, гендер аудит ва бюджетлаштириш тизимларининг жорий этилиши соҳада комплекс ёндашувни таъминламоқда.

Шунингдек, аёллар тадбиркорлигини қўллаб-қувватлаш бўйича кўрилган чора-тадбирлар натижасида сўнгги йилларда тадбиркор хотин-қизлар сони 3,7 баробарга ошгани таъкидланди.

Мамлакатимизнинг парламент тизимида хотин-қизлар иштирокининг изчил ортиб бораётгани қайд этилди. Жумладан, Қонунчилик палатаси депутатларининг 38 фоизи, Сенат аъзоларининг 27 фоизи, шунингдек, маҳаллий Кенгашлар депутатларининг 32 фоизидан ортиғини аёллар ташкил этади.

Бугун мамлакатимиз минтақавий ва халқаро даражада хотин-қизлар етакчилиги соҳасида тажриба марказига айланиб бормоқда. Халқаро майдонда Ўзбекистоннинг бу борадаги саъй-ҳаракатлари юқори баҳоланмоқда. Хусусан, Жаҳон банки баҳолашига кўра аёлларнинг ҳуқуқ ва имкониятларини кенгайтириш бўйича энг катта ютуқларга эришган беш мамлакат қаторида Ўзбекистон ҳам бор.

Тадбирда таъкидланганидек, хотин-қизларнинг давлат бошқарувидаги иштирокини янада кенгайтириш, раҳбарлик лавозимларига тайёрлаш тизимини кучайтириш, жойларда ҳам аёллар етакчилигини қўллаб-қувватлаш долзарб вазифа бўлиб қолмоқда.

Хусусан, хотин-қизларни қарорлар қабул қилиш жараёнларига фаол жалб этиш, уларнинг касбий маҳоратини ошириш, иқтисодий мустақиллигини мустаҳкамлаш, рақамли иқтисодиёт ва илм-фанда иштирокини кенгайтиришга қаратилган ишларни изчил давом эттириш зарурлигига эътибор қаратилди.