АҚШда ядро синовларини қайта бошлаш жараёни бир неча йил вақт олиши мумкин, деб ёзади The Washington Post.

Нашрнинг маълум қилишича, президент Дональд Трампнинг ядро синовларини «зудлик билан тиклаш» ҳақидаги баёноти мутахассислар орасида жиддий хавотир уйғотган.

Экспертлар таъкидлашича, АҚШда тўлиқ ядро синовларини ўтказиш борасидаги амалий тажриба йўқолган, чунки бундай синовлар сўнгги 30 йилдан ортиқ вақт давомида ўтказилмаган. Бугунги кунда синовлар асосан компьютер моделлари орқали ёки субкритик — ядровий портлаш содир бўлмайдиган экспериментлар шаклида амалга оширилади.

Шунингдек, Невада штатидаги полигоннинг ҳозирги ҳолати ҳам синовларни тезда тиклашга имкон бермайди — у ерда капитал таъмир талаб этилади, мавжуд ускуналар эса «занглаган чуқур» деб таърифланган. Қўшимча равишда, полигонда малакали мутахассислар етишмовчилиги ҳам кузатилмоқда — кўплаб ходимлар бу ерни тарк этган ёки ишдан бўшатилган.

Аввалроқ Дональд Трамп Пентагонга ядро қуролини синовдан ўтказишни дарҳол бошлаш ҳақида топшириқ берганди. Бироқ у қайси турдаги синовлар назарда тутилаётгани — ҳақиқий ядровий портлашлар ёки бошқа кўринишдаги тестлар экани ҳақида аниқлик киритмаган.